Alah duo minggu Upiak indak pai ka pasa. Hari ko hari pakan di Bukik, Upiak rancananyo pai ka pasa. Upiak ndak sempat mambuek daftar balanjo doh, inyo alah disasak an dek kusia bendi yang lalu di muko rumah. Upiak buru-buru naiak bendi, nan takana dalam banak upiak beko di pasa mambali maco tukai untuak samba lado, maco gabua jo maco teri.

Sampai di pasa, Upiak tapana mancaliak raminyo urang nan babalanjo. Maklum saminggu lai hari rayo, jadi banyak urang nan ka pasa mambali baju rayo, sapatu rayo, tarompa rayo mungkin ikan rayo gai. Upiak alah dibalian baju rayo dek uninyo nan manggaleh di Tanah Abang, jadi Upiak hanyo mambali samba untuak hari rayo sajo lai.

Salasai balanjo, Upiak lansuang naiak bendi karano arah ka rumah Upiak alun ado oto angkutan nan lalu yang ado bendi. Upiak naiak bendi, manunggu panuah pulo dulu. Isi bendi tu ado limo urang yang duduak bahadok an dan acok lutuik awak baradu jo lutuik urang. Upiak duduak surang sajo di ateh bendi, sampai ado tambahan panumpang. Ciek ciek kironyo datang juo, Upiak basyukur bana kironyo panumpang lai padusi sadonyo kalau ado pulo laki-laki, ndak tangguang malu lutuik baradu jo laki-laki.

Sampai di muko rumah, Upiak lansuang turun dari bendi. Kironyo baju Upiak tasangkuik di tampek bapijak turun dari bendi. Alhasil, Upiak taduduak di aspal, kusia bendi takajuik dan mancaliak ka balakang. “Baato duduak di aspal diak?”. Upiak nan sadang mangka atinyo manjawab,” jaleh urang jatuah kecek uda duduak di aspal” kecek Upiak sambia mambuduik. Untuang Upiak panumpang tarakhir, kalau ado pulo panumpang lain ndak tangguang malu Upiak.