Tantangan hari ke 53

#tantangangurusian

#lestarikan bahasebetawi

Mpok Salme uplek di dapur, ni ari die siapin makanan kedemenan lakinya, soto tangkar. Soto tangkar bahannye ige sapi. Kudu di rebus lame, mumpung libur mpok Salme masak soto, kalo hari kerje, boro boro masak beginian. Kaga ade waktu, keburu telat sampe kantor.

Mpok Salme kelar racik bumbu, kompor nyang tungku satu, dipake buat ngerebus ige sapi lamaan dah waktunye. Satu tungku lagi, mpok pake buat ngukus nasi. Sembari nyale tu kompor, mpok Salme buka hp, kedemenan mpok liat instagrem same yutupan. Due sosmed ntu emang juarenye buat Mpok Salme

Mpok duduk dikursi, girang banget die liat yutup tampilin care dandan biar cakep roman muke. Care bikin alis model samurei, Mpok Salme demen liatnye. Mpok liat juge care buat alis model bulan sabit. Pokoknye mpok demen liat vidio tutorial mekapan, maklum namenye juge perempuan. Dandan kedemenanye.

Sambil liat yutup sesekali mpok longok ke panci masih lame, air rebusan ige sapi ngegolak-golak. Ditowel ntu ige sapi wah masih keras banget. Aman dah main hp.

Balik si mpok keruang tengah ade tiker ngampar, mpok rebahan sembari megang hp. Kali ini mpok liat intagrem, liat oroknye Baim Wong artis nyang bininye baru lahiran. Baru melek ntu orok pinter banget bepoto. Namanye anak artis, pinter dah bepoto. Ntu orok lagi maen tik tok ame babe ame nyaknye, mate mpok masih trus di hp. Semenit, due menit.

Tiba-tiba.

"Lha bau ape ni, kaye bau gosong," suare bang Sanip banter banget betereak lari ke dapur sambil buru - buru matiin kompor. Untung kaga kebakaran.

"Masyaalloh Salme, lu molor kebluk amet. No liat ntu dandang, bekerak gosong ntu nasi!" Bang Sanip bangunin bininya nyang ketiduran sambil neplok bokong bininye.

" Salme angus no, mo masak ape mo molor?" Bang Sanip betereak bangunin bininye.

Mpok Salme gelagepan, bau nasi gosong kecium ke idung Mpok Salme nyang pesek. Si mpok ngelongok ke dandang, tu nasi di dandang kering gosong kaga keliatan bentuk nasinye. untungnye daging ige sapi kaga ikutan gosong, tibang sat doang airnye.

"Maaf ye bang, aye ketiduran " mpok menghibe ke lakinye. Matenye di kucek, sambil ngusep mukenye.

Romanye nyesel banget. Masak gosong diomelin laki.

"Mangkenye Salme, kalo masak jangan molor. Bise angus ntu urusan pendaringan." Bang Sanip ngebilangin bininye.

"Ni mata kaga bisa nahan bang, orang kate ngantuk kaga salamlikum, mate mo dibuka lengket aje, aye pules sebentaran doang, lha gosong nasi aye" mpok cari alesan.

Gare gare Mpok Salme ngantuk, kepakse die masak ulang ntu nasi, cuman die kebingungan kendiri, masalahnye ntu dandang kudu di gosok bersih bersih. Kaga kelar cepet dah, yang ade mpok harus lame lagi di dapur. Cuci dandang dulu kudu bersih. Kaga nahan ngantuk, nasi angus jadinye.

"Hah ni mate kaga kompromi, kepaksa urusan pendaringan musti di ulang, bang ntar siangan dikit ye sarapenye ye bang". Mpok Salme mohon same lakinye.

" Masak lu tingggal molor, berabe urusan pendaringan lu bawa molor. Dah gue sarapan nasi uduk aje di warung Mpok Jujum. " Bang Sanip ngomong sembari ngeloyor keluar rumah. Cepet banget jalennye.

" Dasar laki, cari kesempetan, nggak bise meleng dikit, doyan banget ke warung Mpok Jujum, nggak bise liat jidat licin, bentar-bentar ke warung Mpok Jujum, ape aje bisa jadi alesan." Mpok Salme ngegerendeng .

Gare gare ngantuk semuenye jadi berantakan . Ah magel ni ati. Tesereh die aje dah, nyang penting aye jadi bini kerjaan aye tetep kelarin.

"Ya Alloh moge moge laki gue kaga nakal ye . Moge die cuman mampir sarapan doang." Doa Mpok Salme jage rumah tanggenye.

Semoge kaga ade ape ape ye. Aamiin. Mangkenye kalo masak jangan molor ye mpok. Kebluk si mpok.

Salam literasi