Oleh : Yudha Aditya Fiandra, M.Kom

Lah jadi rahasia umum, dalam darah nan mangalia di tubuah urang minang, ado bakat dan sumangaik manulih nan tinggi. Fakta ko ndak sumbarang sabuik, indak asa takok, alah banyak panulih nasional jo internasional, baiak dari zaman perjuangan sampai zaman alah merdeka, lahia dan tumbuah dari ranah minang.

Sia? Sabuik se lah, ado Prof. DR. H. Abdul Malik Karim Amrullah atau awak biaso kenal dengan Buya Hamka, seorang ulama jo sastrawan. Samo-samo kito tahu, Buya Hamka ko panulih paliang produktif dan populer pado zamannyo. Novelnyo? Jan ditanyo lai, ndak hanyo di Indonesia sajo pambaconyo, lua nagari mulai dari Malaysia, Mesir, Turki dan Arab akrab jo namo Buya Hamka sebagai panulih novel nan maaduak-aduak hati nan mambaconyo. Kito tantunyo tahu, Novel Di bawah Lindungan Ka’bah (1936), Tenggelamnya Kapal Van Der Wich (1937), Merantau ke Deli (1940) dan ratusan karya Buya lainnyo. Bahkan babarapo novel tu lah sukses diangkek ka layar lebar.

Masih kurang juo lai? Kito tantu tahu jo Chairil Anwar, rasonyo jarang urang nan ndak tahu jo rekam jejak beliau, penyair paliang dikenang sepanjang masa, walau rago alah indak tasuo, tulisan beliau ko abadi sepanjang masa, masih banyak dari kito nan ingek puisi beliau berjudul “Aku”, walau beliau ko wafat di usia nan masih mudo, karyanyo ndak usah ditanyo, ado 96 ditambah 70 puisi beliau hadirkan hanyo dalam usia 26 tahun sampai beliau ko wafat.

Masih kurang juo? Masih banyak nan lain nan pembaca bisa cari surang di gugel, ado Tan Malaka, ado Marah Roesli, ado Mohammad Hatta, jan kiro tokoh perjuangan kita, bapak bangsa kito indak manulih, justru dahulunyo beliau yang bergerak dalam perjuangan melawan balando, malawan panjajah dalam bantuak ideologi berupa tulisan, dek itu Mohammad Hatta pernah ditahan dek Balando sawaktu menulis kritik tajam untuak penindasan Balando.

Ambo pribadi, motivasi nan tinggi dalam manulih, hadir karano Ambo selalu maraso, perjuangan Buya Hamka, Chairil Anwar dan lainnyo harus ambo lanjutkan. Jadi sangaik ndak batua kalau ado urang minang mangecek “ndeh, awak ndak pandai manulih, ambo baru baraja”, buang kalimaik mode tu, kito balia’an minang ko berjaya baliak, alah jauah awak tatingga, potensi panulih sangaik banyak, cubo se lah absen ciek-ciek di Gurusiana ko, kalau indak urang minang nan banyak isinyo.

Ambo pribadi optimis sangaik, tanpa bamaksud mengecilkan suku nan lainnyo, minang akan baliak berjaya dikemudian hari, baiak dalam segala bidang, tarutamo bidang sastra, salam satu kampuang. “Minang Manang”.