Appongenna Nariaseng Masewali sibawa Malaka (selesai)

Ripappabbajanna riwettu paseddinna Latok Cacaleppang, nabulanni manukna napagellori panguju-pangujunna. Purana nabulang, naponri baka-bakani nainappa natottong menrek ri salassae siruntuk Datu Soppeng. Lettukna ri yolona Datue, nasujud sompana nainappa makkeda," Taparajaingekka addampeng Puang Datu, Maeloka mappalettu biritta ri ale malebbikna Datue makkeda, napaturungekka pakkita  Dewata’e ri laleng tinroku sitarupa Petta Bulue. Aga nabberekkadana Petta Bulue lao ri iyya makkada, “Makkekkuae riwarekkengngi Tanae Soppeng lollong lisek  ri Raja Malaka, ikomi Latok Caccaleppang maka wedding parewek’i sumangekna Tana’e ri Soppeng. Manukmu Bakka Sewalie bawang wedding kalai manukna Raja Malaka. Naikiya engka paccerakna, yanaritu musajuripi anakmu sibawa sungekmu. Na iyyanae Puang Datu, Bakka Sewalie anakku, upappadai anak ri jajiakku.”

Purana nengkalinga pabbirittaiyyanna Latok Cacaleppang, langsung nasitujui Datue. Marellauni Datu Soppeng ri Latok Caccaleppang kuwammengngi weddingngi alena monriyolo ri tujunna yae jama-jamangnge. Nasaba riwarekkenna Tana Soppeng ri Raja Malaka seddi koritu ‘siri’ battowa. Mamuarei riyamasei ri Dewatae, napakalah Bakka Sewalie. Purai mabberekkada Datu Soppeng, engkani koritu langsung nasitujui Lato Cacaleppang.

Purairo  mappangujuni Datu Soppeng manguju  noo ri lawa-lawa sawungeng manuk’e. Makkacueetoni Latok Cacaleppang saleppangngi manukna Bakkaa Sewalie.  Nassuro duppaitoni Raja Malaka lollong manuk sawunna. De nametta engkani Raja Malaka silollong jowana nenniyya palleppek manukna muttama ri baruga sawungenge. Turung maranang manettoni lisekna Soppeng maelo mitai mabbitte Bakka Sewalie siewa manukna Raja Malaka.

Muttamani Latok Caccaleppang ri laleng lawa-lawae kokkongi manukna. Nasaba alenapa maelo Ieppek’i manukna. Tellemmuui nyawana rileppek ri tau Iainge. Engkatoni palleppe manukna Raja Malaka muttama ri lawa-lawae. Massamang rileppe manukna Lato Cacaleppang sibawa manukna Raja Malaka. Puraana ri leppe langsungna siluppereng.  Na wekka duami siluppereng manuk’e mabbitte pada majjalojoni tabbollo-bollo darae messuu pole ri bebbuana manue. Pada nrolleni manukna Raja Malaka sibawa Bakka Sewalinna Soppeng.

Na deppasa gaga manuk rebba, nateppa mallurui palleppek manukna Raja Malaka maelo sikkii manukna. Aga naluppekna Latok Caccaleppang lawai lapong pappaleppek manuk. Nasaba macaii rilawa ri Latok Cacaleppang, langsung narampuu tappiina mallekko tellue nassorongi lao ri watakkalena Latok Cacaleppang. Tania Latok Cacaleppeng narekko dee najago mencak. Riwettu nasoronna tappiina langsung maala ifii mappasala Latok Cacaleppang. Yaro palleppek manukna Raja Malaka langsung tabbaliang tassungkaling. Aga narampuuni ‘simpaa sikadongna’ Latok Cacaleppang langsung naggajangeng ri lappoo susunna palleppek manukna Raja Malaka. Okkonie wettue mita cule sigajang panontongnge ri laleng lawa-lawae. Mattengngang sigajanna Latok Caccaleppang rekbatoni manukna Raja Malaka. Bakka Sewalinna Soppeng tettong mopi nrolle-rolle mattajeng baali depa narebba. Marukkani to Soppenge pada gora mario marennu mitai pakala manukna Soppeng. Maatemani manukna Raja Malaka, nainappa rebba Bakka Sewalie. Riwettunna nrebba, maitta moopi pirik-pirik nainappa Ieppek nyawana. Ri wettuero rebbatoni Latok Caccalepang massamang rebbana palleppek manukna Raja Malaka ri lalengna lawa-lawa sawungengnge  pada sipolireng mate sigajang.

Riwettu matena Bakka Sewalie rilalenna lawa-lawae, takko engkamuna jarakania loppo langsung salikkii’i yaro bakke manuk’e nalutturengi. Maddupani tinrona Latok Caccaleppang. Alena sibawa manukna ritella’e Bakka Sewalie parewek’i sumangekna Tanae Soppeng. Naikiya nasajuriwi  manuk ripojinna napappadae anak riajajianna, kuaettopa nasajuritoi sungekna.

Natemmaka rennuna Datu Soppeng sibawa tau tebbek’e pabbanuanna seddi Soppeng. Nasaba ikalani manukna Raja Malaka. Makkuniro nasaba rikalahni manukna Raja Malaka aga naparewekni Tanae  Soppeng ri laleng limanna Datu Soppeng sibawa to Soppenge. Purana yaro mallekkek dapurengtoni Raja Malaka, nasalaini wanua Soppeng nasibawai siri rikala manukna.

Riwettuero mabberekkadani Datu Soppeng makkada," Eh..kalaki sininna pabbanuanna Tanah Soppeng, mappamula yae essoe werengngi aseng yaro onronna Latok Caccaleppang pattellareng Masewali (mungin dari kata Mabakka Sewali yah). Kuwammengi ajjak na engka mallupaiwi pappedecenna Baka Sewalie kuwaettopa Latok Caccaleppang.

Makkutopiro paimeng, tanrang pappakarajana Datu Soppeng lao ri Latok Cacaleppang, napparentangengi ri jowana nenniyya pabbanuana Soppeng kuwammengngi ujuuna Latok Cacaleppang ri pattuliliwi ri sininna wanuanna Soppeng nainappa ilemmek. Makkuniro, aga ripattulilini ujuuna Latok Cacaleppang. Siarek-arek ‘Saoraja’ nonroi ripaleppang ujuuna. Okkomani wanua Lajoa paccappureng, okkotoniro rilemmek. Narapii yae essoe iyyaro onrongna rilemmek Latok Cacaleppang ritella’i kampong Cacaleppeng.

Lettu garek makkekkuae rekko tengnga benniwi nabbokka setang asue ri Masewali, engkai naita sumangekna Latok Caccaleppang pole ri kampong Cacaleppeng muttama ri Masewali sappai manukna, Bakka Sewalinna Soppeng. hiiiii..hii..hi..hi hi hi…

(Luttuuni peppajae, pajatoni curitae,…He he he he…Wallahu A’lam Bissawab)

Salamaki To Pada Salama

#Soppeng, 18072020

#Tantangan Menulis 365 Hari

#TaGur Hari ke-119