PISANG ABUIH

Oleh : Ade Putra

#MenulisHariKe-229

Maso ketek - ketek dulu, katiko pai jauah naik oto umum. Biasonyo kalau sampai diterminal, ado sajo urang manjajoan baragam makanan. Mulai dari lamang panggang, ale - ale, paragede jaguang, cubadak, sampai ka pisang abuih, langkok dijuanyo.

Amak, taruih manjagoan ambo nan sadang lalok kalau lah sampai terminal. "Nio lamang panggang atau pisang abuih?" kecek amak. Ambo mintak balian kaduonyo, lamang panggang jo pisang abuih tu. Saking cangoknyo, sabanta se abih dek ambo tu mah. Apolai lamang panggang.

Tadi malam, katiko sampai di rumah mintuo, kebetulan urang rumah lagi masak aia angek. Nampaklah dek ambo pisang batu sasikek di ateh lamari. Langsuang ambo suruah urang rumah untuak ma abuih pisang tu agak tigo buah. Dek hari lah malam, kok makan nasi ndak lo amuah paruik ko do, makonyo ambo umbuak se jo pisang abuih tu lai.

Ado kenikmatan nan ndak bisa kito sampaian, kalau makan makanan nan alami, yang indak ado pangawetnyo. Rasonyo pun manih. Ampuak lo lai. Di tambah jo kopi sagaleh, yo mandanyuik bana raso e. Baa dek dunsanak tu, cubo juolah pisang abuih jo kopi. Hehehehe..

Dharmasraya, 30 Agustus 2020