TABIK RABO

Oleh : Ade Putra

#MenulisHariKe-242

Udin tabik rabo pas sampai di kadai etek Nur. Nyo ampehan kunci honda di ateh meja. Malin, Sutan, samo pak Jorong mancaliak ka inyo.

"Manga marabo-rabo ko udin"? Kecek Sutan.

"Iyo, baru tibo ndak lamak se nampak mukonyo do!" Sambuang Malin.

"Baa ambo ndak ka marabo, dari rumah sampai kasiko, banyak bana urang mintak sumbangan, ma ambek ditangah jalan" Udin manjalehannyo.

"Yo bialah Din, kan mamintak sumbangannyo mah. Apo salah e, kalau ado kito yo nyumbang lah sa ikhlasnyo" Pak Jorong manambahan pulo.

"Bukan masalah nio atau ndak nio ma agiah sumbangan tu. Tapi kalau mode ko juo, nampak bana generasi mudo kito ko, suka mintak mintak. Bayangkan sapanjang jalan, ado nan mintak sumbangan ntuak acara voli, ado pemuda nan mintak sumbangan untuak acara main bola, ado anak gadih tangguang mintak sumbangan ntuak turnamen layang - layang. Apo ndak ado jalan lain, salain maambek ditangah jalan tu?" Udin mampajaleh.

"Iyo juo tu ma din. baa generasi kito ko suko mintak - mintak, manggaduah urang tangah jalan, apo ndak ado solusi lain ntuak manggalang dana, apolai iko kan untuak hiburan semata" Sambuang Sutan.

"Itu nan ambo tuju sabana e ma Sutan. Kok ntuak acara hiburan, carilah ide kreatif ntuak mandapek an dana tu. Misal e, bajualan karambia mudo pemuda tu, manyumbang lah karambia dari rumah agak satandan surang, atau buek pin, gantuangan kunci dari tampuruang, beko ditwarkan ka urang lalu, jadi nampak kreatifnyo. Ndak mamintak - mintal sajo do" Udin nampak galinggaman mancaritoan.

"Batua juo kecek udin mah. Seharusnyo, pemuda kito tu, di didik manjadi pemuda nan punyo ide kreatif, ndak pemuda nan mamintak - mintak do" tadanga suaro etek nur dari balakang sambia malatak goreng pisang di meja.

"Nan mambuek ambo makin marabo, ado etek - etek nan tajatuah dek baranti mandadak diambek dek urang mintak sumbangan tu tadi" Udin lah mulai berang.

"Kalau baitu, yo paralu lo kito rundiangan jo pamuko nagari ma din. Bia ndak tajadi ntuak kaduo kali.

Baitu ota urang dilapau etek Nur. Ado - ado sajo topik nan nyo bahas. Kadang lai dapek solusinyo, kadang ndak ado. Kadang hanyo palamak ota se nyo, sambia makan goreng pisang jo kopi dari etek Nur.

Dharmasraya, 13 September 2020