GEGURITAN
GeGUriTAn
1.
SUMELEH
Abot tenan sirah iki
Ora kepenak kanggo turu
Alon-alon gemletak ono dipan
Tak sawang siji-siji
Reng usuk sing wis dipangan ngenget
Kapan aku bisa ndadani
Sisih wetan
Sisih kulon
Sisih kidul
Lan sisih lor
Wis dicegati panggonan sing kepenak
Wong rakus podo manjelmo
Meh dipek kabeh ora ono turahane
Sak dermo wae aku mangan
Sak onone wae sing penting cukup
Migunakake opo anane
Ra sah golek perkoro
Ora usah golek tambahan sing olo
Percoyo wae
Sing nandur mesti ngundhuh
Ayo poro konco
Diselehke dhisik
Ati sing podo panas
Disabar-sabarake
Mengko mesti ono wektune dhewe
15 Juli 2017
Aryatmono Siswadi, S.Pd, MA
SMP Negeri 2 Bawang
e-mail: [email protected]
2.
KRETEK PLUMBON
Wengi katon peteng ndhedet
Gludhag-gludhug meh udan
Ora ono sawijining lintang kang jumedul
Awakku nembus kahanan kang peteng iku
Lumaku alon sinau golek kapinteran
Brayat kanoman plumbon wis podo ngenteni
Ngajak sinau ngundhuh ilmu
Kanthi grapyak lan geguyon
Ngandhani siji lan sijine
Wanci jam tabuh songo wengi
Awak iki ditinggal konco-konco
Podo ora pamit.....embuh arep menyang ngendi
Takon marang angin..ora ono jawabane
Takon marang jangkrik sing ngerik..malah meneng wae
Meh takon wong sak omah..wis lungo kabeh
................................
Atiku tetep mlayu ngoyak sworo sing wis katon adoh
Adoh banget...kethip banget wis ora keprungu
Sikil iki mlayu sipat kuping
Sikil iki ora bisa diajak kompromi
Sikil iki nggoleki sworo sing wis ilang
Ora let suwe........
Awak iki mabur , nyemplung kretek plumbon
Ora eling opo-opo
Ora kroso opo-opo
Ora ono wong babar pisan
Ora kroso katisen
Tabuh sepuluh..
Tabuh sewelas....
Tabuh rolas....... Nganti tabuh subuh esuk umun-umun
Awak iki isih gumlethak ono sak ngirose kretek plumbon
Aranku gosis.....
Sing kemulan wedhi sewengi muput
Sing nyikep watu ireng gedhe
Sing ora eling nganti sakiki
Sing dadi crita tekan besuke
Matur nuwun marang brayat plumbon
Gusti matur nuwun
Taksih paring kawilujengan
Dumateng kulo !!!
3 Desember 2017
Aryatmono Siswadi
3.
ALAS ROBAN
Panggonane tengah gunung
Asri ...............
Adem .................
Tentrem ..................
Wit-witan jati gedhe dhuwur rapi
Dalane koyo irung petruk
Saben wong sing ngliwati mesti kamitenggengen !!!!
Sarto ucap “ jan apik tenan alas iki !!!!!!!”
Alas roban !
Alas sing wis kawentar
Soko ujung wetan pulau jowo nganti sisih kulon wis podho kenal
Poro peksi urip tentrem
Ora wedi alase digusur
Poro kewan liyane kanthi guyup
Njogo amrih lestarine alas roban
Soko dhuwur jumedhul trek kang gedhe
Soko ngisor ugo akeh mobil, motor sesliweran
Sak tengaing alas roban
Dipajang mobil sedan
Pratondo rikolo semono ono sakjroning kacilakan
Ringsek.....mangan korban
Mulo amrih apike poro sedulur kabeh
Podho ngati-ati
Wong tuwo kondho, unekno klakson rikolo mlebu alas roban
Menehono sakiklase marang wong-wong sing ono pinggir dalan
Sing kanti setio melu nunggononi alas iki
Kabeh mau, duweni pengarep-arep
Biso slamet tekan panggonane awake dhewe ........
Alas roban
Alase wong Batang
5 September 2017
Aryatmono Siswadi, S.Pd, MA
4.
KATRESNAN 1
Tresna kuwi ora adoh soko sliramu Tresna kuwi ora adoh soko awakku
Tersno kuwi yo antarane awakku karo sliramu Tresnamu kaya rembulan
Sing gelem ngancani aku ing wayah bengi Nanging ya kaya srengenge
Sing gelem madangi atiku saben dino
Tresnamu anyes koyo pedhut wayah esuk
Sing gawe ati tetep adhem lan tentrem
Saiki tresnamu sansoyo nyoto Koyo srengenge lan rembulan
Langit ora tahu peteng Sengkolo kebuang amargo katresnanmu
Kartika tresnanmu koyo sumunaring pasuryanmu atiku atimu dadi siji amargo katresnan
Sing wis nyawiji
Sing orang bisa dipisahkake marang apa wae Katresnan utuh saklawase
22 September 2017
Aryatmono Siswadi, S.Pd, MA
5.
KATRESNAN 2
Wingi sore kok tulisake roso tresna Koyo dene sesautane manuk kepodang sing padha geguyonan Ono jroning pang-pang godhonge udan angin semilire angin lelagone langit putih
Mlethek srengenge wayah esuk ndadekake ati sumunar Martakake menowo dhina bakal padang njinggrang Atiku gumebyar koyo cemlorote baskoro
Wiwit kok kandhak’ake tresna iku Mripat iki ora biso turu
Nggayuh tresno kang tulus soko sliramu
Karepe awak njaluk cedhak karo awakmu
Koyo manuk doro sing ora gelem kapisahake
Mau bengi bar udan deres
Laron loro podo mencok ono pager
Banjur mlaku bareng
Mlaku-mlaku sakparan-paran
Amrih bisa bebarengan ngetrapake katresnan sing wis nyawiji
Wiwit kok tuliske tresna iku
Aku ora mangu-mangu
Tresnamu iku tresna sing tenanan Dak tunggu sliramu nggawa warta
Kapan awake dhewe biso sesandingan ...
7 Oktober 2017
Aryatmono Siswadi, S.Pd, MA
6.
GELOMBANG CINTA
Aku tanduran kang endah
Edi peni Uga tanduran kang ombo godong ijo royo Sing ndeleng mesti kepencut
Ngawe-awe njaluk dibopong
Ngertio......
Jaman biyen aku dadi primadona seantero jagat
Pupusku wae dielus nganggo susu
Panggonanku diukir lukisan kang endah
Saben esuk keno cahyo baskoro
Dieman-eman ngalahake samubarang
Regaku ngedap-edapi
Sak wit biso entuk Avansa
Wijiku bae bisa entuk Vario
Awakku diburu
Awakku disanjung
Awakku dijaga koyo pangeran
Soko ujung deso nganti ujung kuto dadi rebutan
Akeh bondo donyo didol kanggo nuku aku
Kepara dadi musuhe tanduran liyan Pancen wektu iku donyo podo edan nggoleki aku
Kembang Gelombang Cinta
Aku rak gur tanduran tho?
Mung tanduran ora bedo karo sak kadangku
Wis wancine gumebyare pupusku ora laku
Wis wancine ijo royo godongku ditinggalno
Akeh wong podo bingung
Akeh wong podo gelo
Gidro-gidro nagis karo nendang awakku
Pungkasane kaendahane sing tak duweni
Wis ora ono regane
Awakku gumlethak ora disopo uwong
Awakku diwenehke tho wae podo ora nglirik
Awakku diselehke sakparan-paran
Wijiku thukul sak nggon-nggon
Jamanku wis ilang
Jamanku wis podo karo kadang-kadangku liyane
Aku rak gur tanduran tho?
31 Juli 2017
Aryatmono Siswadi, S.Pd, MA
7.
SUMUNAR LINTANG PANJER RINA
Delengen wengi iki, bumi isih katon sepi Delengen Lintang panjer rina wis ngetoke cahyo Menehi Pepadhang marang sesama Soko wiwit gumregah tangi nganti ngupaya rejeki
Kanthi setyo ngancani tanpa pamrih
Para among tani wis podo ndandani galengan Kareben banyune ora morak marik
Para wadon ugo bebarengan nandur pari
Sinambiwara wus sengkut makarya Para kyai santri angidung mengestu puja marang Gusti
Rungokno jago kluruk soko sisih wetan nganti sisih kulon Melu nyambut sumunare lintang panjer rino Pandang njinggrang arundaya ngetoke pasuryane
Ndonya alon alon dadi sumringah Maringi kalodhangan jalmo manungso
Ngupoyo pangupajiwa
22 September 2017
Aryatmono Siswadi, S.Pd, MA
8.
ENDAHE TLATAH SANGUBANYU
Yen mandheng kiwo tengen Sangubanyu iki Pikiran gundah dadi endah Nangekake semangat urip Pasuryan dadi sumringah ora susah
Yen ndeleng tanduran ijo royo-royo Kabeh mau ciptaane Sang Yang Widhi Ugo cemlorote srengenge Kanggo madahangi alam semesta iki
Yes nyawang pucuke gunung
Rimbun wit-witan sing duwur nyudul langit
Lukisan mendung putih cemlirit
Nambahi isen-isen alam Sangubanyu
Puji syukur kunjuk dumateng Gusti Allah Marang kaendahan alam Sangubanyu Sing kudu dijaga lestariane
Ojo dirusak opo maneh dijarah Endahe alam iku kanggo warisane
Anak putu
28 Desember 2017
Aryatmono Siswadi, S.Pd, MA
9.
NGREKSA TRESNA
Selawe tahun katresnan ini wus lumaku Tansah ndak simpen primpen ono jroning atiku Ora bakal luntur dening ombaking wektu Kelingan rikolo ngucake janji setio
Ana ngarsane Gusti Kang Moho Agung
Ora bakal ilang eseme lambemu Ora bakal sirna cemlorote netramu
Jiwo rogo iki amung kanggu sliramu
Kabeh mau dadi pratondo tresno kang suci
Tresno iku nancep ono ing kalbuku Bakal manjing sak dowone uripku
Endahing crita katresnan koyo sakjodo manuk doro Sing ora gelem kapisahake Nganti asvathama angslup gumanti soma
21 Oktober 2017
Aryatmono Siswadi, S.Pd, MA
10.
ESUK ING SANGUBANYU
Esuk esuk ing tlatah Sangubanyu
Angin sumilir ngrajut awak sing kademen Nanging bengi mau hawane sansoyo nggigil Udan grimis ngruwis ora ono pedhote Lemahe teles kebes kanggo nyimpen banyu
Esuk umun ing tlatah Sangubanyu
Sing lanang podo kemulan sarung
Tak enteni ora ono sing podo nang sawah opo nang alas
Bener pancen adem banget
Ora maido yen wong-wong kuwi ora menyat soko panggonan
Ngenteni sumunane Bagaskoro
Ndadekake panas lan sumringah kanggo nyambutgawe
Esuk umun ing tlatah Sangubanyu
Jago kluruk soko sisih wetan nganti sisih kulon
Ora biso nangekake cahya srengenge Sing kaya padatan miwiti panguripan
Esuk iki ing tlatah Sangubanyu
Ora bedo karo esuk-esuk sing wis lumaku
Ora bedo karo bengi-bengi sing wis kepungkuri Panas srengenge kewiyak angin sing semribit Njalari tlatah Sangubanyu tetep adhem
Kepenak olehe nyambutgawe
Tegalan lan sawah ngenteni tetanduran
Iki pratondho menowo Sangubanyu subur makmur
Opo wae sing ditandur mesti tukul
Mulane , ayo poro wargo dijogo tanahe
Dijogo tandurane
Kareben awet kanggo anak putune awake dewe
Aja ngowah-owahi adat sing wis mlaku Iku luwih prayoga
25 Agustus 2017
Aryatmono Siswadi, S.Pd, MA
11.
GIRI PERAHU
Perahu, salah sijine giri ing tlatah Bawang Katon gagah yen disawang soko kadohan Pedut putih kandel ing awiyat ndemenake sing nyawang ora kedhip katon asri kena sumunare srengenge
Perahu, salah sijine giri ing tlatah Bawang Ijo royo-royo adem tentrem Wargo sak ingisore lereng guyup rukun mbangun deso Urip kanthi gotong royong dadi paedahe bebarengan
Perahu, salah sijine giri ing tlatah Bawang Sliramu nyediani banyu kanggo panguripan Wiwit biyen nganti sakiki Perahu, salah sijine giri ing tlatah Bawang Gusti Moho Agung Sing wis nyipto Giri kanggo katentremane wargo masyarakat Bawang Ayo dijogo amrih lestarine
Alam giri Perahu
27 November 2017
Aryatmono Siswadi, S.Pd, MA
12.
PANDUNG
Pandung… Gaweane amung siji ngasah gaman ben landep nganggo ungkal Kanggo ngayahi tugase golek bondo
Pandung … akale mung siji piye carane njarah duweke liyanl Sapa wae bakal didadekake tumbal Pandung nggawe nggegirisi wargo ora tau turu ora tau sesrawungan marang liyan
Bebendu Sak gotrah keluargo pendidikan Kabupaten Batang Wis pirang pirang penggonan
Pandung ngorak arik sekolahan! Sing diincer perangkat elektronika
Komputer, lap top, LCD
Pandung...
Nggawe gregetan para polisi! nganti sakiki durung biso dibrantas Mulane dianakake jogo sekolahan bareng-bareng
Kanggo nylametake aset sekolahan
Pandung saiki wis podo kebangeten Wis akeh nggawa korban “ono crito SMP 2 Bawang penjagane tahu dijiret para pandung,
Untunge penjagane duweni nomor polisi sing biso dihubungi,
Wis kadung dijiret, pak polisi cacahe loro podo teko,
Biso nylametake penjaga sing dijiret,
Matur nuwun bapak polisi sampun nylametaken penjaga SMP 2 Bawang”
Mugo-mugo
Bebendu ki enggal sumingkir
Soko tlatah Batang
Kareben penggulowentah bisa ayem tentrem
Ndadekae poro siswo dadi misuwur
Mbangun negoro lan bongso
Kareben poro pandung
Sing wus ngrampok bondo donya Haram yen digunakake lan dipangan Kareben nampa siksa ana ing neraka jahanam
3 Desember 2017
Aryatmono Siswadi, S.Pd, MA
SMP Negeri 2 Bawang
13.
BANYU PANAS SANGUBANYU
Ayo ...
Ayo ...
Ayo ...
Para sedulur, jebule ono panggonan wisata anyar
Ana ing tlatah Sangubanyu Wilayang Bawang
Wisata Banyu Panas
Dumunung ing Pesanggrahan
Saiki, atraksi wisata iki wis kabuka
Dikelola dening masarakat
Siap dadi pariwisata
Objek iki dumunung ing pinggir kali
Sing misahake Kabupaten Batang karo Kabupaten Kendal.
Atmosfer ing saubenging obyek
Kasebut banget nyengkuyung dadi sumilir.
Banyu Panas Sangubanyu nduweni pesona Kecantikan sing menarik banget kanggo ngunjungi. Sing nduweni kaendahan adiluhung Sing biso nggowo jeneng Batang kawentar ing Nuswantoro
16 Oktober 2017
Aryatmono Siswadi, S.Pd, MA
SMP Negeri 2 Bawang
14.
GOLEK UPO
Esuk umun wis tangi gumbregah
Noto kemul senambi ndedongo amrih becike lelakon dino iki
Sumunar srengenge soko timur kang asri
Nandakake minongko uripe donyo kanggo makaryo
Dikancani semilire angin sing nyegerke awak
Pamit mangkat kerjo golek upo kanggo keluargo
Nembus pedut esuk sing adem
Dongane anak bojo nambahi semangat
Alas gung lewang lewung
Redi sing duwur-duwur
Ngancani lelaku sing tak ayahi
Ugo swara manuk lan kledang kledungi wit witan
Dani anteping ati nembus deso liyo
Deso Sangubanyu sing dituju
Minongko penggonan golek upo
Ketemu konco paseduluran sing becik
Bareng lelaku ndandani pesinaunan
Kareben bocahe dadi wong sing migunani
Marang bangsa utamane agomo
30 Desember 2017
Aryatmono Siswadi, S.Pd, MA
SMP Negeri 2 Bawang
15.
BUMINE SAMBAT
Ora awan ora bengi
Ora sore opo maneh isuk
Wong tuwo, wong enom
Opo maneh sing isih bocah
Yen podho mangan jajan nganggo buntel plastik
Dibuwang sak nggon-nggon
Bumine sambat.....
Bumine sedih...
Bumine goyang.....
Lemahe wis ora subur maneh
Katutup plastik
Lemahe sambat
Lemahe nangisi awake dhewe
Amargo ora biso muni
Manungso sak karepe dhewe
Manungso nggugu awake dhewe
Banjir bandhang....
Wis kawentar kono kene
Nanging tetep wae
Manungso ora ngrubah lakune
Duh Gusti nyuwun pangapuro !
(Panjebar Semangat)
Aryatmono Siswadi
16.
SING DIGUGU SOPO
Jenenge Wakil Rakyat
Sing kudune ngayomi lan ngewangi
Sing sejatine dadi penglipure wong sak Nuswantoro
Sing mentingake liyan katimbang awake dhewe
Sing wani mbelani wong cilik
Jengene Wakil Rakyat
Ora isuk ora awan
Ora sore ora wengi
Pakaryane kabeh kanggo kapentingane rakyat
Jengene Wakil Rakyat
Ora tedheng aling-aling
Sing bener mesti dibelani
Jajah deso milangkori
Mangerteni panggonan sing kudu dibantu
Ananging.........
Tangan iki ngelus dodo
Ati iki mbrebes mili ..................nyawang !
Wakil Rakyat turu rikolo ono Sidang Paripurno
Wakil Rakyat gawe rancangan toilet sing regane ngedap-edapi
Wakil Rakyat senengane dolan rono dolan rene
Lelakon sing endi sing kudu digugu !!!!!
Ono ngendi roso welase... sawangen !!!
Bocah-bocah Banten arep sekolah gegantungan ono ing kretek sing ambruk
Bocah-bocah Kediri podo sinau ono ing kelas sing meh ambrol
Tak suwun poro Wakil Rakyat
Balio...mikirke wong cilik
Iku sejati sing di arep-arep wong sak Nuswantoro
(Panjebar Semangat)
Aryatmono Siswadi
17.
GOGROKE BENTENG KEADILAN
Wis ora duwe isin
Ora duwe welas asih
Isine bener thok !!
Atine wis digembok rapet
Wegah ngrungoke ukoro-ukoro becik
Mlakune tetep ndhangak
Ngguya-ngguyu rumangsane ora salah
Diarak wong akeh malah tangane ndhadhahi
Mlebu , lungguh kursi pesakitan ora ndhingkluk
Ananging pasuryane adem ayem
Walah.............. walah...
Arep digowo menyang ngendi Ibu Pertiwi Iki
Sing di tandur barang olo
Sesuke ngundhuh berholo
Sing dibelo wong durhoko
Sesuke ngundhuh sangsoro
Poro pangembating Praja
Opo podho ora kroso
Menowo wong-wong kuwi
Arep nggogroake benteng keadilan
Tambah dino , ora tambah kabecikan
Ananging tambah prekoro sing diarani “kurupsi”
Angel dietung, wis wong pro sing keno perkoro suap
Amargo keadilan wis gogrok
Dheweke ora duweni wedi marang sopo wae
Sing prihatin
Menowo dheweke ora duweni wedi marang Gusti !!
(Derap Guru)
Aryatmono Siswadi, S.Pd, MA
SMP Negeri 2 Bawang
18.
KANGENKU MARANG SIMBOK
Simbok Kangenku Ora Karu-Karuan Kelingan .. ... Rikolo Simbok Gawe Jangan Lombok Kacang Tholo Wis Jan ..Rasane Ono Maneh Segone Thiwul Anget Simbok.. Katentreman Ono Ing Sandinge Gusti !!!!! Aku Anakmu Neruske Laku Mgayomi Anak Putumu... Kareben Urip Tentrem Lan Langgeng Adem Ati Nyawang Ngarep Isih Akeh Sing Kudu Diayahi !
(Derap Guru}
Aryatmono Siswadi, S.Pd, MA
SMP Negeri 2 Bawang
19.
KORUPSI
Piyantune sehat, seger, gagah
Eseme ndemenakake wong akeh
Kepencut...
Ora percoyo
Jebule koruptor
Bareng wis kecekel
Ethok-ethok loro
Gemlethak tanpo doyo
Ora weruh kiwo tengen
Ora krungu ethok-ethok budhek
Tensine tambah dhuwur
Jebule bar mangan sate
Ana maneh
Wis kecekel banjur dipenjoro
Isining pakunjaran barang-barang sing mewah
Jebule petugase wis disogok
Liyane maneh
Wis dipenjoro jebule ana Bali
Bareng ditelusuri entuk paspor palsu
Heng wilaheng....
Kapan paripurnaning prakoro iki
(Derap Guru)
Aryatmono Siswadi, S.Pd, MA
SMP Negeri 2 Bawang
20.
KANGEN
Telung puluh lima taun Aku lunga saka kampung halamanku Titik awal urip Aku nandur boto kanggo pengarep arep Kanggo ngrampungake maknane urip Aku isih nyimpen sakgumpal lemah kelahiranku Ngeculake kabeh kangenku ing dodo Darsono ..... Purwanto ....... Wiwik ....... Ono endi sampeyan saiki Kangen Pasuryanane awakmu asring katon ing atiku Guyonanmu bareng karo kasepenku Sendau guraumu nggitik jiwaku Ejekanmu ngetokake esemanku Aku isih eling Nalika masak singkong ing Baran Aku isih elinga manggang jagung ing Plumbon Aku isih eling Nalika mangan tiwul ing Kebonagung Aku isih eling Panen an kacang ing Eromoko Kulon Aku eling nalika kowe kondho "Kepenginan apa sing awakmu tindakake" Kita wong sing migunani Kanggo kulawarga utamane wong liya Kangen ! Kangen !
Aryatmono Siswadi
Konten pada website ini merupakan konten yang di tulis oleh user. Tanggung jawab isi adalah sepenuhnya oleh user/penulis. Pihak pengelola web tidak memiliki tanggung jawab apapun atas hal hal yang dapat ditimbulkan dari penerbitan artikel di website ini, namun setiap orang bisa mengirimkan surat aduan yang akan ditindak lanjuti oleh pengelola sebaik mungkin. Pengelola website berhak untuk membatalkan penayangan artikel, penghapusan artikel hingga penonaktifan akun penulis bila terdapat konten yang tidak seharusnya ditayangkan di web ini.
Laporkan Penyalahgunaan
Komentar
Kutak mengerti .Selamat Pak