#TantanganGuruSiana

#TantanganHariKe- 70

Pada tantangan menulis hari ini sesuai dengan tema yang ditentukan oleh admin adalah tantangan menulis menggunakan bahasa daerah. Pada kesempatan ini penulis akan menggunakan bahasa daerah Minangkabau dengan judul “Istilah-Istilah Puaso-Puaso Di Ranah Minang”.

Puaso dalam ajarn islam ado sarek-sarek dan katantuan nan alah diatur supayo puaso nan kito lakukan ko mandatangkan pahalo untuak kito dan mandatangkan kebaikan untuak kito. Sarek-sarek dan katantuan puaso ko musti kito patuhi dan kito panuhi. Sabek kalau indak dipatuahi dan dipanuahi sarek-sareknyo mako puaso nan kito karajoan indak ado gunonyo untuak kito do, indak ado pahalo nan dapek, indak ado kebaikan nan didapek salain raso hauih dan litak sajo. Istilahnyo puaso urang puaso awak.

Masyarakat Minangkabau banyak punyo istilah-istilah tantang urang nan bapuaso. Mulai dari istilah contoh pambalajaran sampai ka istilah nan indak patuik dicontoh dan ditiru. Pado kesempatan iko akan kito cubo mangamukokan contoh-contoh parangai nan indak patuik di contoh dan ditiru dalam bapuaso.

Adopun contoh parangai dari urang nan bapuaso nan indak patuik kito contoh dan kito tiru diantaronyo adolah :

1. Puaso ula.

Kalau awk baco tantang ula mungkin awak lah tantu mukasuiknyo. Istilah puaso ula ko digunokan untuak urang-urang nan puaso tapi karajonyo lalok se sapanjang hari. Biasonyo urang nan bapuaso mode iko salasai makan sahur langsuang pai bagaluang katiko paruiknyo alah kanyang dan inyo akan tajago katiko lah dakek masuak wakatu babuko.

Istilah puaso ula ko ado pulo mukasuiknyo nan lain. Kalau nan partamo tadi tantang parangai ula. Kalau nyo lah kanyang mako inyo akan lalok. Nan kaduo ko mukasuiknyo adolah caro manangkok ula. Ba caro manangkok ula ?? untuak bisa manangkok ula harus di paciak an kapalo jo ikuanyo dulu sudah tu baru dimasuk an kadalam karuang. Urang nan puaso mode iko adolah urang nan puaso hanyo hari partamo dan hari tarakhir. Istilahnyo puaso pembukaan jo penutupan. Puaso nan mode iko indak buliah kito contoh karano puaso nan mode iko adolah puaso urang nan banyak aka, puaso urang pamaleh.

2. Puaso satangah hari.

Istilah puaso satangah hari ko acok digunokan untuak mayabuik urang-urang nan lah dewasa nan baitu samangek katiko sahur sasudah itu samakin siang samangeknyo samakin kandua dan maraso ndak sanggup lai puaso sudah tu puasonyo nyo batalkan. Biasonyo puaso satangah hari ko bagi urang minang adolah puaso untuak malatiah anak-anak bapuaso sampai nyo bara talok bapuaso walaupun hanyo sampai satangah hari. Nan jaleh alah bapuaso walaupun anak-anak ko ndak diwajibkan untuak puaso. Tapi kalau untuak urang nan alah dewasa atau alah gadang ndak ado istilah mode ko, kok ado juo nan mode tu, urang ko samo puasonyo jo anak-anak. Kalah dek anak-anak bapuaso. Bahkan anak-anak ado nan talok sampai masuak wakatu babuko untuak puaso.

3. Puaso uwok taruang.

Istilah puaso ko digunokan untuak urang-urang nan lambek bapuaso tapi paliang capek bahari rayo. Biasonyo manjalang puaso masuak pamarintah dan organisasi keagamaan ataupun sakalompok urang maumuman bilo puaso. Urang puaso nan mode iko nyo ikuik urang puaso nan terakhir. Baitu pulo bilo hari rayo masuk. Mako inyo akan maikuik ma hari rayo nan paliang dulu itu pulo nan inyo ikuik. Uwok taruang ko adolah kuliner minang yaitu taruang dimasuak an terakhir kali sasudah nasi manggalagak dan alah kambang baru taruang di masuk an. Kalau nasi lah kariang mako taruang nan di uwok an tadi paliang partamo dikalua an atau dibangkik dari dalam nasi.

4. Puaso baliak papan.

Istilah puaso baliak papan ko digunokan untuak urang nan bapuaso katiko ado di dalam rumah tapi katiko nyo ado balakang dapua puasonyo tadi nyo batalkan diam-diam atau manyuruak-nyuruak. Puaso nan mode iko tamasuak juo puaso urang nan panduto, dimuko urang rami nyo icak-icak puaso, tapi katiko urang ndak ado nyo makan dan minum sudah tu nyo mangaku puaso lo ka urang banyak. Masuak wakatu babuko inyo pulo nan paliang dulu babuko.

Ikolah sekilas istilah-istilah perilaku puaso nan ado di Minangkabau manuruik pangathuan penulis walaupun masih ado nan lain nan ndak tacatat. Nan jaleh pamakaian istilah-istilah ko adolah indak hanyo sabagai sindiran atau control social tapi juo barisi nasihat untuak pemuda pemudi nan baraja puaso. Juo istilah-istilah ko biasonyo di jadikan hiburan atau lelucon manjalang manunggu babuko puaso. Pado akhirnyo hanyo Allah lah nan akan manarimo puaso dari urang-urang nan bapuaso sasuai jo sarek-sarek dan katantuan nan lah diatur dalam agamo islam.

Salamek Bapuaso !!!

Solok, 25 April 2020