#TantanganGuruSiana

#TantanganHariKe- 91 MenujuTantangan 365

Pada tantangan menulis hari ini sesuai dengan tema yang ditentukan oleh admin adalah tantangan menulis menggunakan bahasa daerah. Pada kesempatan ini penulis akan menggunakan bahasa daerah Minangkabau dengan judul “Jan Suko Maupek”.

Salah satu sipek nan tacela atau sipek buruak nan harus kito hindari dan kito jauahkan dari diri kito adolah suko maupek.Sipek maupek ko dalam agamo ndak buliah dikarajoan. Sabek kalau dikarajoan sipek maupek ko bisa mambao awak masuak kadalam narako. Dalam al-qur’an surek Al-Humazah Allah berfirman nan aratinyo, “Calakolah atau narako wail lah bagi tiok-tiok urang nan suko maupek dan suko mencela”.

Kalau awak paratian dalam hiduik sahari-hari manusia ko memang suko maupek. Saketek-ketek maupek. Ado se nan diupek an nyo. Hujan hari maupek. Hujan ka hujan se hari ko bilo kakariang pakaian nan disasah ko, ndak dapek manga manga wak dek inyo do. Paneh hari maupek juo baru. A nan nyo upek an, paneh ka paneh se hari ko. Lah kariang kasadonyo. A nan ditanam ndak ado nan tumbuah, mati kasadonyo. Baitu pulo kok dapek bantuan. Tatek juo maupek. A nan nyo upek an. Ba kok saketek bana bantuan ko. Ba kok ndak banyak. Kok ndak dapek bantuan maupek juo baru. A nan nyo upek an. Ba kok ndak dapek wak bantuan. A beda wak jo urang. Urang mandapek awak ba kok indak. Mode itulah urang nan suko maupek. Apo sajo bisa manjadi upek untuak inyo.

Kadang-kadang maupek ko tibonyo dek buruak sangko ka urang lain. Banyak contohnyo basuo dek awak, upek ko tibonyo dek buruak sangko ka urang lain. Dalam hiduik sahari-hari di kantua contohnyo. Ado tamu nan datang. Sudah tu tamu ko masuak karuangan pak kepala. Tamu nan datang ko ruponyo mambao bungkusan. Bungkusan ko dimasuak an kadalam plastic. Plastiknyo gadang pambungkuihnyo. Banyak isinyo didalam. Ruponyo tamu nan datang ko Nampak dek urang nan suko maupek tadi. Sia tu nan datang manamui pak kepala ?? Bungkusan apo nan nyo again ka pak kepala tu?? Padohal nan datang ko mintuo pak kepala. Mancaliak itu tibo upek, makan surang se pak kepala ko ndak nyo bagi-bagi ka awak do. Basobok urang di jalan disapo dek awak nyo aniang se. Tibo lo upek. Ongeh bana urang tu, lah disapo dek awak ndak nyo jawek. Mantang-mantang minantunyo urang bapangkek. Pado hal urang nan disapoko talingonyo pakak. Katiko disapo ndak tadanga dek inyo. Dan masih banyak contoh-contoh nan lain basuo dek awak.

Sipek maupek ko ndak hanyo ka urang lain. Awak samo awak bisa juo datang upek. Orang gaek ka anak. Anak ka rang gaek. Mintuo ka minantu. Minantu ka mintuo. Laki ka bini. Bini ka laki bisa juo timbua upek. Urang gaek ka anak contohnyo. Dari ketek anak lah di gadangan. Lah babininyo ndak takana nyo dek awak do kecek urang gaeknyo. Karano nampak dek urang gaek ko anaknyo lewat mambao bungkusan gadang karumah bininyo. Nan anak ko ndak singgah ka rumah urang gaeknyo. Tibo upek dek urang gaek ko. Anak ndak mambaleh guno, dari ketek digadangan dek awak, lah babini nyo ndak takana dek awak do. Sagadang tu bungkusan nan nyo bao ndak nyo agiah wak saketek do. Padohal bungkusan nan di bao dek anaknyo tadi batu aia nan nyo ambiak di batang aia untuak mambangun. Dek ndak ado ongkos ka pambao batu ko pulang tapaso batu ko di jujuang se pulang. Atau anak ka urang gaek. Urang gaek awak ndak adia. Kakak awak nyo agiah pitih banyak. Awak nyo agiah saketeknyo. Anak lah maupek lo ka urang gaek. Padohal saharusnyo ka nan gadang tu yo banyak pitih diagiahan ka inyo. Kabutuhannyo banyak. Nan ketek kabutuhannyo saketek tantu iyo saketek lo anak ko diagiah pitih dek urang gaeknyo. Dan masih banyak contoh-contoh nan lainnyo.

Jadi dek karano itu marilah awak jauahi sipek suko maupek ko. Jan suko maupek. Jadilah urang nan suko batarimo kasih dan basyukur ateh pambarian tuhan ka awak. sabek sipek suko maupek ko akan mandatangkan karugian untuak awak baik di dunia maupun di akhirat bisuak. Babaiak sangkolah ateh apo nan Allah barikan untuak awak. jan sampai baburuak sangko. Karano dari buruak sangko ko bisa mandatangkan upek ka awak.

Solok, 16 Mei 2020