Salamaik malam dunsanak ambo kasadonyo di manopun barado. Batamu baliak jo ambo Buya Zulkifli. Baitu urang di kampuang maimbau ambo. Walaupun sabananyo ambo alun patuik diimbau jo “buya”. Karano ilmu jo amalan alun sasuai jo urang nan biaso dipanggia jo buya tu.

Dek karano warga Ranah Minang cukuik rami di blog Gurusiana ko, bahkan barado di paringkek nan ka ampek provinsi tertinggi, mako ambo cobo pulo mambuek atau manulih carito singkek nan bakaitan jo kehidupan kito sahari-hari di dalam rumah tanggo. Judulnyo “Kiper Maju, Salasai Urusan?”

Ambo berharap, indak ado nan tasingguang ataupun nan talantuang. Sabalumnyo ambo mohon maaf kalau ado kato-kato nan kurang tapek. Maklumlah, lain lubuak lain pulo ikannyo. Lain padang lain pulo bilalangnyo. Lain nagari lain pulo bahaso jo kurenahnyo. Atau kalau ado nan samo namo, tampek atau kajadiannyo. Carito iko murni imajinasi ambo salaku penulis. Mari kito ambiak pelajaran nan takanduang di dalamnyo.

Patang hari tu, Mak Mu’in baru sajo pulang dari sawahnyo nan talatak di baliak Bukik Gadang. Tuduangnyo masih tapakai di ateh kapalo. Cangkua pun masih disandang di bahunyo. Tapi baju jo sarawa nan dipakainyo lai indak bakubang luluak lai do. Karano lah digantinyo sasudah mandi di batang aia di tapi sawah manjalang shalat Ashar tadi. Mak Mu’in pun singgah di kadai kopi Mak Sutan.

“Assalamu’alaikum, Mak Sutan!”. Mak Mu’in maimbau nan punyo kadai dari baliak pintu kayu nan lah lapuak dimakan maso tu.

“Wa’alaikumussalam. Oii.. Mak Mu’in kironyo. Masuaklah, Mak! Jawek Mak Sutan dari dalam kadai.

“Buek an ambo Kowa Daun ciek, Mak Sutan. Tapi jan manih bana ndak! Beko dapek pulo ambo sakik urang kayo tu beko”

“Jadih, Mak! Jawek Mak Sutan sambia taruih bajalan ka arah balakang untuak manyiapkan minuman Kowa Daun sasuai jo pamintaan Mak Mu’in.

“Ondehh... baa kok kusuik bana tampang Mak Mu’in kini nampak dek ambo? Tanyo Mak Sutan sambia mahidangkan Kowa Daun jo sayak tampuruang nan alah dibarasiahan sebelumnyo. Di alehnyo jo sakarek batuang supayo nak jan tagolek.

“Maklumlah, Mak Sutan! Kiper tu lah maju kini.” Tibo-tibo si Udin ikuik manyolo sabalum dijawek dek Mak Mu’in. Udin yang dari tadi asyik jo hp canggihnyo, tagak talingonyo mandanga pertanyaan Mak Sutan tadi.

“Oii... Udin! Indak elok mode itu doh. Hormatilah beliau. Kan lah tuo dari pado Adiak” sambung Mak Sutan

“Iyo, baitulah, Mak Sutan. Ambo kini iyo serba salah jadinyo. Indak ka dibuliahan urang rumah karajo, pai maaja anak-anak ka sakolah tu, inyo lah payah sakolah tinggi-tinggi dulu. Ciek lai, lai pulo lah lulus jadi pagawai. Walaupun ambo kini tapaso manjadi kipernyo. Kalau ambo basikareh pulo, tantu baeko anak-anak juo nan ka taniayo jadinyo.”

“ Tapi... maaf, Mak Mu’in. Bukannyo Mak sarjana juo dulunyo? Baa kok ka sawah kaladang juo mode kami nan indak basikolah ko, Mak? Tanyo Udin panasaran.

”Itulah namonyo rasaki, Udin. Walaupun samo-samo bausaho, samo-samo basikolah tinggi, tapi kan indak sadonyo baruntuang bisa jadi pagawai do. Nan pentiang bana, kan busaho.” Jawek Mak Sutan pulo.

“Tapi... ambo iyo salut mancaliak Mak Mu’in ko, Mak Sutan! Cubo bayangkan dek Mak Sutan! Indak ado laki-laki, suami nan namuah mambantu karajo rang rumahnyo do. Walaupun inyo indak bakarajo tatap. Tapi Mak Mu’in ko, satiok hari lai pai ka sawah ka ladang, sakali-kali lai ikuik acara di nagori sasuai jo sarjananyo. Namun, baliau ko namuah mambantu karajo isterinyo nan sibuk pai pagi pulang patang dek maaja di sakolah.”

“Udin, lai pernah mambaco kisah Nabi Muhammad SAW? Baliau tu Nabi, Kapalo Negara, Panglimo parang. Tapi baliau indak sagan manjaik surang bajunyo nan cabiak. Padahal isterinyo lai di rumah. Baitu juo jo minantu baliau, Ali bin Abi Thalib. Ali ko taruih mambantu Fatimah manggiliang gandum untuk dijadikan tapuang untuak mambuek roti. Maso iyo awak nan bukan siapo-siapo bilo dibandiangkan jo baliau-baliau tu, indak namuah pulo manolong induak bareh wak surang?” sambuang Mak Mu’in.

“Batua itu, Udin! Walaupun kadang rang padusi ko, kalau lai namuah lakinyo manolong, inyo acok pulo lupo diri. Sahinggo nan kalamak dek inyo se manyuruah-managah lakinyo. Kan lah durhako ka laki namonyo tu! Inyo acok lupo jo tugas jo tanggung jawabnyo di rumah sabagai isteri jo induak dek anak-anaknyo karano sibuk dek tugas-tugas di lua rumah” sambuang Mak Sutan

“Haaa... itu mukasuik ambo kiper maju tadi, Mak Sutan! Memangnyo, kalau kiper ko lah maju bisa salasai urusan? Atau malah tambah runyam jo kusuik dibueknyo? Atau kalau nyo bubuih gawang ko dek kawan beko baa ?” tanyo Udin tambah panasaran.

(disambuang baisuak lai yo, Dunsanak ambo kasadonyo. Karano hari lah laruik malam. Insya Allah, kalau lah tarang bak hari, kito sambuang carito ko baliak. Tarimo Kasih)