Kabeh sing urip mesti tahu lair. Nyong ya kaya kuwe duwe dina lair. Kanca kancaku kabeh ya kaya kuwe. Unggal tahun dina lair kuwe mesti tanggal lan wulane teka maning. Aja keliru gur tanggal lan wulanesing teka mening udu tahune. Tapi wong wis salah kaprah, dtanggal karo wulan sing teka maning kuwe pada ndarani ulang tahun. Angger dinane tah teka maning unggal minggu. Sing laire Senen ya unggal minggu mbok ana dina Senen. Angger dina laro pasarane bakal teka maning unggal 35 dina sepisan utawa selapanan. Dadi sing laire Slasa Kliwn ya ana Slasa Kliwon maning 35 dina maning. Lha angger arep ngarah dina, pasaran, tanggal lan wulane bareng teka maning ya nunggu sewindu. Unggal ulang tahun wong wong kuwe pada gawe acara nggo mengeti. Acarane ya sejen sejen. Ana sing pesta mewah pirang-pirang panganane lan wong akeh sing teka. Ana sing gur nraktir kanca-kanca sekantor, ana sing gur dzikir syukur maring Gusti Alloh dene esih diparingi urip nganti siki. Ana sing kelalen ora tahu ngemut emut dina ulang tahune.

Beda karo ulang tahune Kabupaten Purbalingga. Acarane werna werna pisan, wektune sewulan muput. Kang tanggal siji kabeh kantor perintah kudu masang bendera lan umbul umbul uga layur sing kelire abang lan putih. Desa ya kaya kwe mulane Pak RT ku ya wis masang layur rontek sedawane dalan sing ana nang wiayah RT ku. Ning wong RT li duite ora akeh ya duwene layur rontek udu sing wutuh bujure dawa pisan, kan regane larang. Tanggal 6 molaih ana lomba karawitan pirang pirang dina, soale kelompokke dewek dewek. Sedina go kelompok antar OPD, sedina go kelompok antar kecamatan, sedina go kelompok antar sekolah lan ana kelompok liya liyane sing nyong ora apal. Nggo melu lomba karawitan, kelompok kantorku latihan pirang pirang wulan. Malah Pak Tama salah sining staf bidang kebudayaan sing pinter karawitan dadi laris banget, Dewekke dadi sibuk banget diundang kantor-kantor sing kepengin dilatih karawitan, nganti pada antri. Bar kuwe ana Purbalingga Expo kang tanggal 14 tekan 17, ramene pol. Terus tanggal 16 ana Purbalingga Vaganza sing isine kaya peragaan busana nang karpet sing digelar nang dalan sebelah lor alun-alun. Busasanane ya aneh aneh pisan, ana sing kaya lawa ireng amba pisan, ana sing kaya kupu gede gede, ana sing pating kruwel amba tur duwur. Kabeh nganggo rangka sing gede, dadi kayane ya abot, angger suwe ya pegel ndean. Ana maning Pahargyan agung pas nang tanggal lire Kabupaten Purbalingga ya kuwe tanggal 18 Desember diterusna kirab metu kang pendopo muteri alun alun terus tekan kantor DPRD. Esih ana maning acara ya kuwe pawe Budaya tanggal 30 lan pesta kembang api tanggal 31 Desember karo nyambut tahun anyar 2018.

Nyong karo Bapakke bocah ya ganu melu teka nag acara Pahargyan Agung kuwe. Nembe lagi tekan alun-alun Bapakke nggolet nggon parkir madan angel, nang latar museum wis madan kebek, nang latar pemadam kebakaran ya kayane wis akeh, akhire olih nang pinggir dalan sisih wetan alun-alun. Tapi mataku ora patia melu nggolet nggon parkir kuwe, aku malah ndeengna alun-alun sing esuk kuwe keton beda pisan, separone puteran pinggir alun alun kebek roncean kembang sing gede gede pisan, tengahe tulisan Selamat Hari Jadi Kab. Purbalingga. Kabeh kayakuwe, sing beda gur pengirime. Dalan ngarep pendopo ya kaya kuwe malah kiwe tengen tur gede gede pisan, ana sing PT PT sing ana nang Purbalingga, ana BUMD, ana kang Gubernur, ana kang Menteri Dalam Negeri nek ora salah. Pokoke apik apik pisan, swasanane dadi sumringah. Nyong mikir liyane, “kuwe duit ya pak pada digletak gletakna”, nyong ngomong karo Bapakke. “iya kuwe, kuwe sing kang UPT regane 400 ewu, jere sing paling murah!” kayakuwe wangsulane Bapakke. “Padahal ngesuk wis ora kanggo ya Pak” omongku. Aku dadi kemutan dompetku sing wis tipis. Barang nang njero aku karo sebelahku ya pada ngetung bareng-bareng, sing kang UPT ana 18 ditambah kang kepala SMP 13, kuwe sing genah rega 400 an. Sing MKKS jere 1 juta. Sing gede-gede tur apik kuwe ya paling ora se jutaan. Jumlahe ana puluhan kayane ya merek 40 an. Kuwe duwit kabeh ya, pada digletakna mambrah mambrah. “Alah kuwe toli pikirane rika sing lagi ora duwe duit “ malah aku diwadani kaya kuwe nang kancaku. Iya ndean. Tapi umpamane tiru undangan kondangan sing nganggo pengumuman “ora nampa sumbangan kembang utawa kado” kayane lewih manfaat yaa. Umpamane diganti “Karangan bunga diganti duit lan dikumpulna go nyumbang panti asuhan” utawa go pesta panganan gratis ! Umpamane ikih !