#tantangan_hari_ke_80

(Masih serial si Malanca)

“Mak… mak… capeklah, Anca ka barangkek lai.” Rarau Malanca maimbau Sabai, amaknyo. Sabai nan sadang duduak tamanuang, tasentak takajuik. “Oiihh Malanca, baa kok sakareh tu bana basorak?” Tanyo Sabai sambia tagak dari duduaknyo.

“Sajak tadi Anca imbau, amak anok sajo, yo tapaso basorak jadinyo lai.” Malanca pandai maagiah alasan. “Ondeeehhh lah pindah pulo pinyakik Marepet ka Malanca yo, banyak alasan!” Sabai ampia tabik suga nyo.

“Tu, ka pai kama Malanca kini? Baa kok pakai baju saragam sikolah?” Sabai heran mancaliak Malanca basaragam sakolah, padohal masih PSBB. “Iyo mak, kecek Marepet baraja di tampeknyo, amaknyo jadi guru, dan harus pakai saragam.” Malanca manjalehkan ka amaknyo.

Sabai maangguak angguak sajo, antah mangarati antah indak. Matonyo nana mancaliak Malanca. Digosok-gosok incek matonyo, raso ado nan beda dari si Malanca, tapi apo yoo?? Sabai mancari nan ganjia dari penampilan Malanca.

“Haaa… baru amak tau, Malanca pakai minyak abuak abak yo?” Sabai manuduah Malanca. “Eeeee lamak se amak ko. Indak ado Anca mamakai minyak abuak abak doh.” Jawek Malanca santai. “Tu minyak sia nan Anca pakai, baa kok bakilek abuak Anca?” Sabai manyalidiki. “Ssssssttt mak, ko minyak goreng amak Anca ambiak saketek, Anca campua jo aia, bia mangkilek.” Malanca babisiak ka amaknyo. “Astaghfirullah… Anca… Diuruang samuik kapalo tu beko yuang!” Sabai galigaman mancaliak parangai anaknyo.

“Capeklah mak. Ambiak an bekal untuak Anca, baraja di rumah Marepet.” Malanca maiirik tangan amaknyo ka balakang. Sabai capek maambiak rantang ketek, diisinyo nasi nan ba angek an, dah tu dimasuak annyo sayua toge, jo dadak randang stek. “Amak pilik, amak ceke, masak dadak randang sajo? Agiah lah dagiangnyo agak sakuduang.” Malanca mandabiak pinggua amaknyo. Sabai dek ibo, dimasuak an juo dagiang randang sakuduang ka dalam rantang Malanca. Sanang hati Malanca.

Tas basandang di lihia, basalempangkan ka pinggang. Tangan sabalah suok mamacik rantang nan babungkuih jo sapu tangan. Malanca barangkek ka rumah Marepet konco palangkinnyo. “Hati-hati yo Anca. Kok auih minta sajo aia minum ka amak Marepet dih.” Sabai basorak dari jauah. “Oke bro!” Sorak Malanca ndak kalah karehnyo. Sabai binguang, anaknyo maimbau, Bro.

“Pet… Pet…” Malanca maimbau Marepet dari lua. “Iyo Nca… tunggu sabanta.” Jawek Marepet dari dalam. “Baa langsuang mulai baraja kito?” Malanca alah duduak malepok di lantai ruang tamu. “Sabanta lai Nca, Bu guru alun datang lai.” Marepet manjawek. “Kama bu guru?” Tanyo Malanca. “Sadang di balakang.”

“Assalammualaikum anak anak. Alah siap kita main sekolah?” Tibo tibo Maimunah, amak Marepet mancogok dari balakang. Malanca dan Marepet tagalenjek. “Jaaadih bu guru.” Malanca capek manjawek, samantaro Marepet mandakek ka amaknyo. “Mak… bekolah barajo nyo, kini makan sajo dulu.” Rengek Marepet ka amaknyo. “Baiak anak anak, beraja kita tunda, kini kita makan saja dulu.” Maimunah maumumkan jo bahaso Indonesia nan kaku. “Jadiiih bu guru.” Kiniko suaro Marepet nan kareh.

Marepet jo Malanca mulai acara makan. Malanca mambuka bungkuih rantangnyo, dikaluakannyo rantang, lalu di buka nyo tutuik rantang. “Pet, kecek amak Anca tadi, kok minum minta sajo ka si Marepet.” Malanca alun mulai manyuok nasinyo. “Sagaleh yo.” Rajuak Marepet. Malanca maangguak.

Aia minum lah tibo, sagaleh untuak Malanca sagaleh untuak Marepet. Ciek-ciek suok nyo lah masuak ka muluik masiang-masiang. “Nca apo samba nan diagiah?” Marepet batanyo sambia mancigok ka dalam rantang Malanca. “Ondeeehhhh mak, randang yo. Agiah den saketek dih? Makkk maaak. Malanca samba nyo randang.” Marepet basorak bantuak urang kabakaran. Maimunah capek mancogok kalua.

Maimunah tasengeang sajo galak, mancaliak Marepet mambagi dagiang randang si Malanca, dadaknyo diambiak juo. Malanca agak tamanuang, dagiang nan gadang diambiak Marepet, kok ditanyo, ado amaknyo, Malanca takuik. Nyo tahan sajo.

“Bbbuuaaahhkk… huk huk…” Marepet tabatuak dan muntah kahak. Dikaluakannyo sado nan ado di muluiknyo. Capek nyo minum aia putiah. Matonyo sirah, paluah maiilia. “Apo samba ang ko Anca?” Marepet batanyo. Malanca tapacak karingek dinginnyo. Ado apo nan tajadi koh?

“Randang Pet. Baa tuh?” Malanca manjawek tanyo Marepet. “Cuboan lah dek ang dagiang randang tu.” Marepet manunjuak ka rantang Malanca. Malanca maambiak kuduang, langsuang dikunyahnyo. “Haaaahhhh…” Malanca tapakiak sambia mamacik pipi sabalah kida.

Malanca binguang, baa kok randang nan nyo harok an, mako iko nan tajadi. Jaleh amaknyo mamasuak an randang ka rantangnyo. Baa kok batuka jo langkueh kareh, pada muluik Malanca marasokan. Capek-capek mereka baduo ko disuruah kumua kumua ka kamar mandi dek Maimunah.

Tarago anak-anak ka kamar mandi, nyo kicok juo dek Maimunah dagiang randang Malanca. “Huaaakkk huakkk…” Alun sampai dagiang tu balulua, Maimunah rarak gigi mukonyo ciek. “Baa sakareh tu bana dagiangnyo. Apo batua lai dagiang tu? Atau iyo baitu?” Sambuah tanyo dalam diri maimunah.

-salambedaraso-