#Tanganganmenulis Hari ke 13

#Tantanganmenulis Bahasa Daerah

"Uwan.... Uwa... Dima uwan latak an pinggan cako, buliah nak den basuah, bacilapuik pulo beko". Sorak Upiak Banun dari balakang rumah.

" Lah den latak kan di ujuang jandela. Tapi galeh den ijan diabsuah pulo, aden masih ka minun". Jawek Uwan Jawir dari tangah rumas, sadang mangguluang daun anau ka jadi paisok.

Diraguaknyo kopi nan dibuek dek amaknyo, Uwan jawir mairuik dalam dalam daun anau baguluang nan dibakannyo, keceknyo paisok. Nampa cukam pipi Uwan Jawir kutiko mairuik daun anau cako.

Hari galok galok tarang pagi nangko. Uwan Jawir lah manyalempangkan kain saruang ka bahunyo. Kain deta lah lakek di kapalo, tangan kida mamacik embe, tangan suok mamangua cangkua. Inyo barangkek ka sawah.

"Mak! Mak! Den ka sawah dulu". Sorak Jawir, guluangan daun anau masih malakek di antaro duo bibianyo nan alah agak maitam. Sakali sakali kalua asok putiah dari muluiknyo.

" Iyo... Jan lupo gubalokan kabau mak Naih dih, agiah makan, dan tu mandikan sakalian". Jawek amaknyo dari dapua.

Uwan Jawir gagah malangkah manuju sawah. Nampak rauik muko nan agak kareh dek dimakan karajo. Pipi cukam kutiko maisiok daun anau, asok putiah mambumbuang ka langik. Aia ludah nan ampia jatuah, diiruiknyo baliak, dan diluluanyo.

Uwan Jawir, malatakan kain saruang jo embe di dangau tapi sawah nan ka nyo bajak. Bajunyo tuka jo baju nan tagantuang, itu baju khusus untuak ka sawah. Uwan Jawir masuak ka sawah satalah badoa labiah dulu. Daun anau nan tadi langsuang di buangnyo ka pamatang.

Sawah lai agak lambuik, dek hari ado hujan. Mulailah Uwan Jawir mahayunkan cangkuanyo. Cangkua mahujam ka tanah, lalu diiriknyo ka balakang supayo tanah mambaliak. Baitulah karajo rutin Uwan Jawir dan urang lain nan sadang mambajak. Kalau di urang nan kayo, mambajak ko bisa mamakai kabau, bisa juo mamakai masin taraktor. Tapi Uwan Jawir acok mambajak surang sajo. Labiah nikmat keceknyo. Sakali sakali sajo nyo baok kabau mak Naih mambajak sabalun dimandikan.

Mato ari lah mulai tinggi, paluah lah bacucuran, sawan nan dicangkua tingga saketek lai. Dari jauah tampak Upiak Banun, adiaknyo sadang bajalan di pamatang sawah, maarah ka Uwan Jawir. Uwan Jawir capek bajalan manuju dangau. Badan ko paralu istirahat.

Upiak Banun sampai di dangau, Uwan Jawir lah salasai mancuci tanggan jo kakinyo. "Uwan. Ko aia minum jo kopi, dan ko makan siang Uwan. Kecek amak sabalun pulang cuci dulu pinggan jo cawan kumuah tu. Jadi di rumah amak ndak panek mancuci lai". Upiak Banun manyampaikan sambia duduak bajuntai di tapi dangau.

" Aka kau koh, kau nan maleh mancuci pinggan jo cawan den, kau kecekan pasan amak". Uwan Jawir manuangkan aia minum ka cawan, lalu diraguaknyo langsuang. Nyo duduak basanda ka tiang dangau.

"Iyo bana Uwan. Oh iyo... Ko radio nan uda pasan kapatang, lah den ambiak dari tukang montirnyo. Upahnyo perai sajo". Sambuang Upiak sambia manyorongkan radio ketek ka Uwannyo.

" Alhamdulillah. Iyo elok si Buyuang tu yo, ndak amuah nyo dibayia upahnyo. Mudah2an samakin banyak rasakinyo". Uwan Jawir badoa dalam hati. Lalu di nyalokannyo radio. Siaran nan nyo cari adolah RRI.

Tiok siang RRI manyiarkan saluang jo randai. Sambia makan, Uwan mandangakan dendang saluang nan mandayu dayu. Lamak bana makan Uwan Jawir. Makan jo ikan sapek, uwok daun parancih dan samba lado. Bailiran paluah Uwan.

Salasai makan, Uwan basanda ka tiang dangau. Diguluangnyo baliak daun anau, lalu dibakanyo. Basanda sambia maisok daun anau, talingo mandanga saluang. Ondeeeh jauah pangana Uwan Jawir dibueknyo.

Uwan Jawir tibo tibo manggadangkan suaro radiinyo, tadanga suaro panyiar manyampaikan dendang barikuinyo. "Dendang selanjutnya adalah Tak Tontong". Uwan Jawir paliang sanang mandanga dendang ko. Nyo padakek radio ka talingonyo. Mulailah Uwan Jawir mandangakan dendang Tak Tontong.

"Tak tontong kalamai Jaguang

"Tak gunda gunda kacambuang basi.

" Dahulu balaki anjuang,

"Kini balaki tukang padati". Uwan Jawir mengikutinya.

" Sajak pabirik di indaruang

"Lori bajalan di ateh kawek

" Sajak maningga mande kanduang

"Nasi diminta, sumpah nan dapek". Mato Uwan Jawir manutuik, sabana dihayatinyo dendang tu. Apo lai bunyi saluang nan mandayu dayu, angin bahambuih sepoi sepoi. Tambah jauh pandakian lai, kecek tukang padati. Bisiak hati Uwan Jawir.

" Piak... Kau dulu sajolah pulang, baok rantang ko sakalian. Pinggan jo cawan bia den baok beko. Den ka lalok cacah". Uwan Jawir manyuruah adiaknyo pulang. Upiak Banun langsuang tagak manyusun rantang dan mambaoknyo pulang.

Lah jauah Upiak Banun maninggakan dangau, Uwan Jawir marabahkan badan. Kini dimatikannyo radionyo karano siaran barita. Uwan Jawir maleh mandanga barita. Dek inyo nan paralu pikirannyo tanang, kok barita nan nyo danga, bakuliliang incek matonyo, apo lai kini ada pirus korona. Ndak jaleh dek nyo doh.

Sambia marabahkan badan, nyo ulang baliak dendang tadi. "Sajak maningga mandeh kanduang, nasi diminta sumpah nan dapek". Kato kato lagu tu diulang taruih. Sampai nyo talalok. #Salam rangkikcangang