GULAI SAMBUANG

Hari ko ambo ka pai balanjo ka pasa tibo-tibo amak ambo kalua dari kamar.

“Apo samba nan ka dibuek kini ko?” tanyo baliau sambia manyanggua rambuik nan lah marato putiah.

“Jan itu ka itu se nan dimasak, lah ndak basalero den makan do indak barasak dari lauak, ayam, kok dak dagiang”, “Cubo lah sakali-sakali diaja lidah tu jo masakan tradisional, kami dahulu murah se modal samba nyoh, sado isi parak bisa di buek masakan, lamak makan dek nyoh kok lalu bagai mintuo dak nampakbagai do”.

“Apo dek amak nan ka tuju?” kok lai ado pulo urang manjua di pasa isi parak nan amak sabuik tu beko ambo balian cuma kalau ambo dak bisa mambueknyo tolong amak tunjuakan ambo”.

”Sarupo paku, rabuang, taruang, sambuang lamak tu mah”. kato baliau manjalehan.

Mandanga itu ambo bapikia, iko sakalian nan pakai “uang” disabuik dek amak ko alah pernah ambo cubo tapi kok nan terakhir ko iyo lah ndak pernah ambo mancubo do. Sambuang atau ado juo yang manyabuik kincuang, bantuak e sarupo bungo lai menarik nampak dek ambo cuma di baunnyo ko ambo nan dak tahan do sanak a, bak namonyo baun nyo mauang kadang raso baun kapindiang bagai. Baa kok suko pulo lah amak ambo ko dek nyo? Biasonyo makanan ko urang tertarik dek aroma nyo yang menggugah selero tapi baa pulo urang ka tergugah dek baunnyo se takuik urang dek nyo. Tapi demi urang gaek bialah dituruikan juo kandak belliau.

“Beko kau balilah sambuang yo lah taragak den makan gulai sambuang tu”. Kecek Amak sambia manahan aia salero lah taraso dirangkuangan bantuaknyo.hehe

“Jadih mak siap!”.

tibo dipasa ambo carilah sambuang ko

“Jo paku ko kawan nyo campua jo lauak lamak dek amak ibuk beko tu” Urang mangaleh maagiah tau.

Iyolah ambo bali pulo sambuang jo paku sarato lauak ambu-ambu panginco nyo.

Tibo dirumah “mak iko yo amak ajaan ambo caro mambuek e nyo”

Siang ko ambo mamasak gulai sambuang, paku sarato lauak ambu-ambu tu baraso anak sikola sadang baraja PKK dikawanan guru.hehe…Amak yo lah bantuak chef nan di tipi tu pulo lagak e maolah bumbu-bumbu nyo.

Akhie nyo masak juo lah gulai sambuang ko, tagageh Amak ambo maabiak piriang sarato nasi nak mangicok gulai sambuang hasil eksekusi kami hari ko. Ondeh sanang bana hati mancaliak amak makan sangaik lahap nyo mancaliak kulek baliau mambuek ambo jadi ingin pulo nak mancubo. Diambiak pulo lah nasi sapiriang diambiak sasendok kenek gulai tadi takuik kok indak lamak. Onde mande iyo takicok ambo kironyo dari sasendok ngenek kini manjadi tigo sendok ampek sendok masuak ka piriang ko. Tanyato nan tabaun busuak ko dak selalu indak lamak do sanak. Iyo mancandu jadi nyo. Amak…amak..ado-ado se makanan amak yo.hehe

Salamaik mancubo gulai sambuang sahabat guru nan alun pernah mancubo..

Salam literasi