Tantangan Hari ke-27

#TantanganGurusiana

Sasudah mambaco carito si Hayati jo Uda Zainuddin nyo, Iroih mamacik garamannyo dek taraso panek-panek. Iroih batanyo ka si Hayati, “lai indak panek Yati wakatu mambuek carito pakai baaso awak ko?” kironyo yo ndak salah dugaan Iroih do, yo tapanek pulo Hayati wakatu mangetik carito babaaso Minang tantang inyo jo uda Zainuddinnyo tu. Kini Iroih maraso katuju pulo bacarito jo baso awak ko. Baso awak ko paralu pulo di lastarian dalam bantuak tulih manulih sarupo iko.

Iroih, namo aslinyo Rosmawar. Sabananyo Iroih ko nio bana di imbau urang jo namo ketek nan diagiah ama jo apanyo, “Ros”. Namo bungo nan harum sarato rancak lo. Tapi dek lidah minang urang-urang dakek rumahnyo, tapaso lah si Ros ko marelaan namonyo batuka manjadi Iroih.

Iroih ko baru kapatang ko wisuda baru. Kini nyo sadang maaja di tampek les Bahaso Inggirih. Kawan dakek Iroih di tampek karajonyo Juih panggilannyo. Namo kapanjangan Ijuih ko sangaik la ka rancak, Puti Zejusti. Panggilan dari amanyo Jus, tapi yo lah ka nasib juo, Jus ko manjadi Ijuih kalau awak di Minang ko nan maimbauannyo.

Iroih ko anak kos, yang mancubo peruntungan di nagari urang. Dapek bakawan jo Ijuih sabana mambuek Iroih sanang. Ijuih bukan anak kos, inyo tingga jo urangtuonyo di rumah gadang. Rumah Ijuih ko saarah jo rumah Iroih. Jadi, tiok pulang maaja les, Iroih mamboncengan Ijuih sampai ka rumahnyo.

Dek karano ampia tiok ari batamu, yo batambah arek hubungan Iroih jo Ijuih ko. Walaupun satiok ari basuo, Iroih jo Ijuih ko masih bakirim-kirim pasan wa lo tiok malam. Coitulah dakeknyo hubungan arek kawan sapamainan ko.

Tapi baru-baru ko, Iroih dapek karajo nan labiah rancak. Iroih baranti dari tampek les bahasa Inggirih tu, siap tu nyo pindah ka tampek karajo baru ko. Masalahnyo, tampek karajo baru Iroih ko babeda nagari jo tampek nan lamo. Kiro-kiro sajam perjalanan harus ditampuah jo onda ka tampek baru ko.

Samanjak pindah ka tampek baru, hubungan Iroih jo Ijuih nampak makin ranggang. Sakali-sakali Iroih lai masih ma-wa Ijuih. Ijuih lai mambaleh, tapi pendek-pendek sajo. Bitu pulo sabaliaknyo. Sampai kini, alah satahun Iroih di tampek baru, tapi yang hubungan jo Ijuih ko yo ndak co dulu lai do. Iroih sampai batanyo-tanyo, lai tulus pertemanan mereka dulu tu? Apo sabab mako ndak dakek mereka ko kini lai? Sampai kini Iroih masih indak tau apo jawaban dari pertanyaan gadangnyo ko do.

Batusangka, 16 Februari 2020