MUMET

Dening: Eko Budiyono

Iki dina Ahad (6/3). Wayahe nulis muatan lokal, yaiku nulis kanti nganggo basa daerahe dewe-dewe. Gandheng asalku saka Jawa Tengah, mangka tulisanku dina iki migunaake basa jawa. Aku ora arep nulis babagan kang wigati. Nanging, aku mung arep crita prakaryan dina iki kang gawe mumet. Lha kok isa? Pancen kudu ngunu lakune, hehehe.

Sepisan, dina iki Pak Amin Hidayat (Kepala Dinas Pendidikan Kabupaten Grobogan) lan Bu Tietiek Soertirahajoe ( Ketua AGPG) nembe kagungan kersa. Yaiku mantu putri sulungipun kang asma rara ayu Joe Azatil Ishmah Amin. Ingkang dipun dhaupaken kaliyan kang mas bagus Dicanatta Santari saking tlatah Jagalan Lor, Purwodadi. Dene anggenipun kagungan kersa wonten Kyriad Grand Master Hotel, Purwodadi. Nanging, aku ora isa melu mangayubagya dina iki mau. Wingi aku sowan ana ing daleme karo anak, mantu, lan bojoku. Masia ora isa teka, aku seneng ndhelengke karangan kembang kang jejer-jejer katon tumata ana ing sangarepe hotel. Awit, salah sijine saka Asosiasi Guru Penulis Grobogan ( AGPG) kang aku uga ana ing njerone asosiasi kuwi.

Kapindha, keleresan dina iki mau kakangku ya mantu. Aku ketiban sampur dadi seksi calon manten ponakanku dewe Lutfi kang di daupake karo Anang saka tlatah Pohawe, Sendangwates,Kunduran,Blora. Gandheng aku wis dipercaya dadi seksi manten, dadine aku ora isa mara ana ing Purwodadi nekani pawiwahane bapa Amin dalah keluarga.

Kaping telune, esuk mau aku entuk khabar yen kanca-kanca pengurus pramuka kwartir ranting Ngaringan usung-usung. Dene barang kang diusungi yaiku etalase lan administrasi kang ana ing sanggar pramuka sing lawas. Gandheng saiki wis nduwe sanggar, mangka administrasi lan ubarampene diusungi ana ing sanggar kang anyar.

Dina kang mumet kanggoku. Awit sejatine telung gawean kang kudune aku melu ngayahi, nanging ora isa kabeh tak lakoni. Nanging, Alhamdulillah nyatane kabeh katon tumata lan mlaku kanti apik. Mugi-mugi Gusti tansah paring ijabah sedaya ingkang dados niat sae punika. Aamiin. (eb)

Singopranan, 6 Maret **(censored)**

Tagur 365#79