#Tantangan Gurusiana

#Hari Keduapuluh

GULAI MARUNGGAI JO SAMBALADO MACO

Oleh Emiwati, S. Pd.

Assalamualaikum Dunsanak,

Mudah-mudahan di hari Akaik ko sanak sehaik-sehaik kasadonyo, dalam linduangan Nan Kuaso. Hari ko hari kaduopuluah ambo manulih di Tantangan Gurusiana. Ambo cubo pulo manulih dalam baso awak. Indak rumik-rumik do dunsanak. Ambo sadang taragak gulai marungai jo sambalado. Itu kadok dibuek mande ambo, waktu ambo ketek dulu. Waktu masih di tanah pusako, Nagari Paninggahan, tapi danau Singkarak.

Dulu, kalau libur sikolah, ambo pulang kampuang dari Palembang. Sahari duo hari di rumah, ambo mulai bakandak ka mande kanduang. Nan pasti ado pangek bilih. Tapi gulai marunggai jo samba lado, nan partamo. Caro mambueknyo indak lo rumik do sanak. Batang marunggai lai lo ado di laman awak. Kok ka mancubo, baiko caronyo yo.

Ambiak daun marunggai nan mudo. Biasonyo pucuak-pucuak dahannyo tu bapatahan. Sudah tu ruruik daunnyo, basuah dulu yo. Cuci kato anak-anak kini. Sudah tu siapkan kuahnyo. Santan jalang dari kiro-kiro sakapiang karambia. Bumbunyo sipadeh/jahe, bawang merah, jo bawang putiah, diirih-irih sajo sanak.

Masuk an bumbu nan bairih ka dalam santan. Jarang jo api sadang elok. Kalau la manggulagak, masuk an daun marunggai. Diaru lambek-lambek, sudah tu gulagak an sabanta. Alah masak tu ma. Angkek lah lai. Tapi jaan langsuang disantap. Kalau surang inyo indak sero do. Bakawan jo samabalado owok, barunyo sero.

Sambalado uwok tu murah pulo caro mambueknyo tu ma. Bahannyo lado sirah agak saganggam, tomaik tigo buah nan sadang elok, bawang merah 3 sampai 5 siung, jo bada maco baka, kok indak maco goreang jadi juo. Uwok lado, tomaik, jo bawang dalam sia stentlis. Jo tampek lain nan tahan angek jadi juo. Sudah tu giling kasa. Agiak agaram. Masuk an maco, tokok tokok setek. Giliang jadi juo, tapi jaan lumek bana. Masuak an air lado nan dalam tampek mauwok tadi. Campua kan sampai rato. Samba lado maco la siap santap tu ma.

Alah tabayang dek ambo, beko siang, makan nasi angek, jo gulai marunggai manih. Raso tadanga capak kulek. Ondeh, iyo bana datang salero awak, dek tabayang sabalado maco. Kini kan hari akaik ko ma. Hari perai. Awak sadang bakumpua sakaluarga. Awak buek palapeh taragak, gulai marunggai jo sambalado maco.

Kok payah sanak mancari daun marunggai, japuik se ka rumah ambo. Tapi kalau sanak tingga di rantau iyo payah mancari e tu ma. Kalau di rantau indak dapek sanak mancari daun marunggai tu do. Cari se lah “daun kelor’ yo!

SALAMAIK BASANTAP DUNSANAK

KOK ADO NAN SALAH,

AMBO MOHON MAAF,

JO SAMBAH SAPULUAH JARI

Wassalamu Alaikum Warahmatullahi Wabarakatuh,

Subuah Akiaik di Muarobulian, 9 Februari 2020