PANEH BADANGKANG

Paneh badangkang ko iyo tapek untuk bafoto basamo. Apolai langik cerah, tarang bandarang bana. Tapi jan lamo-lamo, selain hangek, paluah bacucuran, bisa sakik kapalo nan tibo. Tapi manyuruah capeklah foto tu diambiak, indaklah mudah. Iyo sabana payah manyuruah anak-anakko manyusun barisan. Nan surang tibo, nan ciek pai. Nan dua alah duduak, dan surang minta parmisi pulo mintak izin ka toilet. Indak anak sajo nan susah diatur do, apak jo mandenyo iyo pulo. Dek alah banyak nan barek badan, lambek pulo datang ka lokasi. Tapi indak baa do, hasilnyo lai rancak. Sadonyo bagembira ria. Namun alun tantu baa hasil ujian anak ko lai. Kito doakanlah anak kito sukses ujiannyo, sakolahnya, cerah masa depannyo sacerah hari ko. Nan foto basamo paralu pulo Handehhhh yo zaman selfie kini ko.

Alah sapakan atau mungkin juo alah labiah dari sapakan, hari paneh badangkang. Dima duduak, kawan banyak mangaluah, hangek bana ko hari haa, awak taraso kalangsangan. Paneh-paneh ko iyo teh es nan kalamaknyo kecek kawan . Ado juo sabagian nan mangecek an, diminum aie es, batuak salemo pulo nan ka datang. Onde mande bamacam carito kawan kalau alah duduak basamo di ciek ruangan.

Ado nan mangecek an, ondehhh kok di rumah awak kini koha, alah awak jamua salimuik jo kasua, dilambuik banta guliang jo banta picak, bia mati kuman-kuman. Sado ruang kurisi tamu, di helo di jamua pulo, pastilah busanyo baliak mangambang. Baru sanang duduak-duduang babincang-bincang.

Dulu katiko urang ka masuak bulan puaso. Amak-amak kito sibuk mangarajoan nan sarupo tadi tu. Bulan puaso ditunggu bana. Iyo menjadi tamu nan dinanti-nanti. Harok basobok jo bulan itu, sado isi rumah dibarasihan, tamasuak, paregek-paregek nan paralu di basuah. Hari paneh ko paralu bana untuk manjamua sadonyo, tamasuak bungo palastik nan alah banyak abunyo. Sasudah dirandam, digunda, lalu dijamua jo hari paneh badangkang cando kini ko. Katiko dibangkik dari panjamuran, alah bakilek, barasiak, babaun harum.

Masuak bulan puaso indak lamo lai do, tapi aroma jo ciri-ciri khasnyo alah mulai taraso. Baitu hebat dan sucinyo bulan puaso. Banyak nan alah mulai bakameh-kameh dalam masalah dunia. Tapi alah awak bakameh jo persiapan iman awak? Karano itu nan paralu sakali.

Salam literasilah ciek dulu…