Dalang Jemblung klebu salah sijine kesenian asli Banyumas sing wujude unik. Kesenian kiye ora nggunakna tetabuhan kaya kesenian Jawa liyane. Dalang Jemblung mung ngandalna swara pemaine sing nirokna swara gamelan.

Jaman siki kesenian kiye wis jarang dipentasna, bedha karo kesenian ; lengger, genjringan, macapatan, lan ebeg sing esih disenengi masyarakat Banyumas.

Nang kurikulum SD ana materi muatan lokal budaya Banyumasan kanggo upaya nguri-uri budaya asli Banyumas. Kabupaten Banyumas sing pusat pemerintahane nang kota Purwokerto wis dijuluki kota pelajar lan kota budaya.

Nang tlatah Banyumas ana tradisi, nek ana wong nglairna bayi utawa nguyen. Mbengine tangga teparo padha diundang tirakatan utawa lek-lekan tekan subuh. Kanggo cagak lek ben ora ngantuk ana sing nembang macapatan. Miturut sejarahe macapatan dadi maca kanda sing dadi asal-usule Dalang Jemblung.

Pemaine paling 5 nganti 7 wong sing pementasane nang njero umah, salah sijine pemain wong wadon sing dadi waranggana utawa sinden lan salah sijine pemain dadi dalange ngrangkep dadi pemain.

Peralatane Dalang Jemblung mung nganggo kudhi utawa gaman khas Banyumas sing gunane kanggo gaman adegan perang. Alat liyane ya guwe cempala sing gunane nggo keprak dalange.

Pakean sing dinggo pemaine pakean khas Banyumas, kaya ; sorjan, blangkon utawa iket, jarit batik, sandale selop sing biasane denggo upacara resmi Banyumas. Crita sing biasane dipentasna padha karo crita wayang sing diarani babad menak utawa serat menak, critane nyangkut masalah penyebarane agama Islam sing wis kondang kaya dene wong agung menak. Padha bae sing dicritakna nang pementasane wayang golek menak karo lakone sing wis kondang, kaya ; Amir Hamzah lan Umar Maya-Umar Madi, kadang ya dalange nyritakna crita panji.

Pemain Dalang Jemblung sing wis pengalaman, pinter nggawa banyolan utawa lelucon sing agi disenengi masyarakat Banyumas. Sanajan siki wis kurang disenengi masyarakat, nang desa-desa esih sok ditanggap, mergane kesenian Dalang Jemblung dianggep murah lan paling gampang pementasane. Kejaba nggo hiburan uga kena nggo panutan sing akeh muatan pendidikane liwat sindiran-sindiran sing pas karo kahanan masyarakate.

Kabupaten Banyumas sing ibu kotane nang Purwokerto sing wilayahe sengisore gunung Slamet, kota sing adem lan tenang sing bisa dadi penyangga Kabupaten Cilacap lan Kabupaten Purbalingga. Kota Purwokerto wis dijuluki kota pelajar, kota wisata, lan kota budaya, masyarakate sing ramah bisa dadi masyarakat sing maju tanpa ninggalna tradisine sing adi luhung.