Tantangan Hari ke -87

#TantanganGurusiana

Lah 16 hari awak manjalanan ibadah puaso. Karano masih dalam situasi covid-19, pelaksanaan sambayang tarawih ndak dikarajoan bajamaah di masajik, tapi dikarajoan di rumah masiang-masiang. Ado kauntuangan nan upiak rasoan jo kondisi saat kini, upiak jo anak-anak bisa sambayang bajamaah basamo-samo di rumah. Kalau puaso-puaso sabalumnyo upiak jo kaluarga jarang bajamaah, karano suami upiak manjadi pangurus di musajik, sahinggo 5 wakatunyo, taruiah di musajik sajo.

Partamo tarawiah wakatu itu, sibungsu upiak lun mangarati apo sambayang tarawiah tu.

“Buuu,,ba kok banyak-banyak tu na wak sambayangnyo, panek kaki dedek dek nyo aa”, katonyo mangeluh.

“Sambayang nan banyak tu namonyo tarawiah yo deekk”, upiak pun manjalehan ka inyo.

“Jan Panjang-panjang na baco surek nyo tu Yah, leno deka aa,”katonyo katiko disuruah manaruiah an tarawiahnyo tiok salasai salam.

Sampai kini asa maleh hatinyo, ba na diumbuak untuk sambayang tarawiah, nyo dak ka amuah sato tu do.

Dan pas sakali wakatu tu, suami upiak manyuruah anak bujang upiak nan nomor duo, untuk manjadi imam tarawiah. Salasai salam sibungsu langsuang mamuji udanyo,

“Aaa..lamak uda yang jadi imam lai Yah, dak do dek kantuak sambayang tadi do.”katonyo mambuek kami tagalak sadonyo.

Sabananyo dak cuma sibungsu sajo nan marasoan do. Kami nan ikuiak bajamaahan iyo marasoan samo lo. Mungkin dek anak bujang upiak mambaco ayatnyo lai jo irama tartil, yang di palajarinyo di sakolah, jadi memang taraso sanang manyimak annyo.

Sanang jo bangga hati upiak mancaliak anak bujang upiak, lah bisa jadi imam di rumah kami. Salasai sambayang tarawiah, upiak langsuang agiah reward inyo, dek lah amuah jadi supir kaduo ayahnyo. Sajak itu kalau ayahnyo manyuruah jadi imam tarawiah, anak bujang upiak dak manolak do. Dan mode malam kini, katiko suami upiak dapek jatah piket malam satgas covid, upiak dak ragu untuk bisa jamaahan lai, dek anak bujang lah bisa diandalan.

Anak bujang upiak lah bisa mambuktian kalau tantangan hafiznyo lah bisa dibuktikannyo. Dengan lancar bisa membaco ayat-ayat yang bukan di juz 30 sajo. Semoga kelak anak bujang upiak bisa menjadi hafiz dan cinto Al-Qur'an.

Dan mungkin raso sanang nan upiak rasoan, dirasoan pulo dek urang tuo yang lain. Dan upiak danga murid-murid upiak ado juo nan bisa jadi imam di rumah kaluarganyo, katiko mangarajoan sambayang tarawiah di rumahnyo. Sabagai guru-gurunyo kami pasti bangga pulo. Semoga kalian bisa mempraktekkan ilmu yang lah kalian palajari di sakolah salamoko yo. Ciek sisi positif corona nan bisa wak rasoan, di rumah kalian bisa menjadi imam sambayang bagi kaluarga kalian.

Solok, 09 Mei 2020