Jere jamane wis maju, jere era digital, jere jaman kekinian. Nang ngapa pas ana lindu sing di thuthuki esih kentongan. Ujarku wong jamane wis maju ora ketulungan kaya kiye, wis ora nabuih kenthongan, ganti karo wa, instagram, apa facebook. Jebule theklek kecemplung kalen, timbang golek alung balen.

Kepriwe bae majune jaman, kenthongan tetep bae jawara. Ujarku sih, nek penemumu kepriwe kang?

Omongane rika bener kang, pancen kenthongan kuwe ora ana gentine, mbuh arep majua kaya ngapa jamane. Soale kenthongan digawe sekang alam, pring nek ora kayu, dadi mesti lestari. Ora kegiles nang owaeh jaman. "Kenthongan is the best".

Nek rika kepriwe yu?

Nggo aku kenthongan wis ketinggalan jaman, jadul, ora uptodate, ora kekinian, pokoke ora zaman now bangetlah. Wis ngonoh dipikir, apa kenthongan bisa nggo sms, bisa nggo wa an, facebookan, apamaning instagraman. Bisa apa ora? Rika ora pada nggo tehnologi anyar, dadi ngertine mung kenthongan thok. Nek nyong, lagi ora sombong kiye, nang ndi-ndi eksis. Rika eksis pada ora ngerti mesti, tek wei ngerti siki, eksis kuwe ana terus, tampil. Lha aku siki gambare nang ndi-ndi ana, soale fotoku tak pasang nang kono. Ora kaya rika pada.

Yu Ndremis pancen siki wis kaya artis, nyong wingi weruh gambare lagi nang terminal, kacamataan ireng, lambene lifenan abang mbranang, klambine kuning jreng, ilate melet dawa banget, karo tangane ngewei tanda jriji loro. Nang ngisore ana tulisane "otw tilik biyung nang ngumah". Rumangsane wis kaya artis temenan, rumangsane apik banget, kayane. Nyong ndeleng fotone, maune kepengin madang, dadi ora doyan madang.

Aja kaya kuwe rika kang? Ngece temen, rika durung ndeleng gambarku liyane, sing lewih apik, esih akeh. Kuwe rika mung sentimen karo aku bae, soale rika ora bisa eksis kaya aku, ya mbok? Rika bae sing gaptek, mulane tuku hape sing mandan larang, nyicil tuli bisa, dadine mengko rika ora gaptek. Nggo foto ya genah. Nggo nulis, tulisane ya apik.

Gyeh... rika pada ribut mung gara-gara barang kaya kuwe. Kabeh duwe kelewihan karo kekurangan, ora usah pada paidon, sing penting aja pada kelalen mbayar. Ngobrole ta iya, buket banget, giliran kon mbayar pada klalen.

Rika tenang bae kang, ... gedang gorenge wis mateng durung?, dienteni ket mau, ora metu-metu. Kopi kiye jodone gedang goreng, ndi kang? Aja diumpetna baelah. Rika jane niat dodolan apa ora sih.

Bener rika kang, kiye lhe dodolan mandan ora niat kayane. Nyong pesen kopi segelas, masa mung diwei setengah gelas, ngarang banget bakule.

Wis siki pada mangan sing serius, kang tulung gedang gorenge ditokna ngeneh. Karo kopine yu Ndremis dikebeki sisan, mengko kabeh aku sing mbayar. Ora usah kuatir.

Apa rika duwe duwit kang? Bakule takon. ... nek siki durung ana, tapi ngesuk aku duwe. Trus siki rika gagah arep mbayari kabeh, arep mbayar nggo apa? ... siki ya utang ndisit kang, ... kaya kuwe be ora ngerti.

Bakule trus mlebu njero karo nggawa gedang goreng sing maune arep di tokna. Nek ngomong ta iya, kaya iya iya a, dompet kopong arep ngebosi kancane, kaya kuwe ngakune "zaman now". Mbelgedes kabeh.