#TantanganGurusiana

Tantangan menulis hari ke 59

Sakbenere ket dino kemis iko awakku kroso gak enak. Mosok aku ketularan konco sebelahku sing awake yo gak enak. Tapi yo ngunu iku emak-emak koyok aku ngene iki masio kondisi kurang enak tapi yo tetep penggawean rutin tak lakoni. Sopo maneh lho.

Sabtu wingi aku yo jek tetep ngelesi. Nek aku gak teko sakno areke. Deweke iku pinter lan semangat banget dolek ilmu. Aku sakno nek areke gelo aku gak teko nang omahe. Pas nang omahe aku yo gak lali gawe masker ben aman. Terus takpikir yo gak nemen. Mangan yo isih enak. Bubar ngelesi muridku sing wis les karo aku sing suwene pitung tahun iku, awakku kok kroso tambah gak enak, awak panas, watuk, pilek, tenggorokan rasane kemriyek

Wis langsung ae aku menggok nang puskesmas faskes siji nang Pralon sekitar jam sewelas.

Mari daftar ternyata jenengku cepet di celok. Aku yo heran tumben iki maeng kok cepet biasae uantri. Langsung aku diperikso karo doktere. Lan dokter iku takon opo aku mari lungo adoh. Yo tak jawab paling adoh nang Jogja lan Solo. Iku wae wis telung minggu kepungkur. Nek aku durung tahu lungo adoh koyok Pak Eko Adri Wahyudiono iku sing wis ngumeti ndunyo iki he he. Lan ngageti maneh jarene dokter ono data sing dukur ngluwihi soko normal. Tak lerek ae opo iku aku gak ngerti blasss. Banjur dokter ngomong wis demi amane lan ben eruh onok opo ning awakku iki aku dianjurno perikso nang laboratorium.Rasane dredeg kabeh, aku yo wedi lan aku dungo nang Gusti Alloh mugo-mugo diparingi sehat lan gak ono opo-opo. Ternyata yo cepet aku perikso lan di jukuk darahku, sepuluh menit wis metu hasile. Canggih yo mung sepuluh menit wis eruh datae. Gak koyok biyen rong dino baru eruh hasile.

Banjur ngunu, kertas hasil perikso lab diprikso bu dokter lan alhamdulillah bu dokter ngomong nek aku aman lan negatif soko virus corona. Mung nggreges biasa cuma dipesen dikongkon balek nek gak ono ondane. Langsung aku diwenehi resep kanggo nebus obat. Minggu isuk iki maeng aku masak sing gampang lan gak butuh waktu akeh. Ayam goreng, ndog ceplok. tahu, tempe lan sambelan iku masakanku dino iki. Oh iyo aku yo gawe kolok kacang ijo lan jamu kunir, laos, jahe tak campur dadi siji. Awan awak wis enak soale yo maem teratur, ngombe jamu, cukup ngasoe, santai onok hiburane MGI langsung aku koreksi hasil ulangane murid-muridku. Sorene tak gawe nyetliko rong gunung, isoh-isoh piring, bersih-bersih omah. Bengine melok kegiatan istighosah nang kampungku. Alhamdulillah mene siap mlebu nang sekolahan maneh.

Moker, 15032020