Urang manjuluak bungo sampelo,

bungo di kaik kauntuang anyang.

Kito taruihan carito nangko,

Carito dalam bahaso Minang

Langangnyo kini surau gadang,

langang dek barito nan baru bakambang,

virus carona nan sadang manggarang.

Tamanuang Buyuang di rantau urang,

Pangana berek nandak ka pulang,

tapi dek bini jo anak kini malarang.

Tamanuang-manuang Buyuang di balakang rumahnyo di rantau urang. Sadang tamanuang, tabayang dek Buyuang maso dulu, hiduik jo mande kanduang. Mande bansaik ayah tiado, tarasai-rasai Mande manggadangan anak nan balimo. Jo sala bulek anak di gadangan.

Kok kini urang nandak mambuek sala lah ado tapuang urang nan manjua. Tapi kok maso dulu nan, apo lah nan ka disabuik, jo lansung jongkok, bareh ditumbuak jadi tapuang.

Tabayang dek buyuang inyo maonjak-onjak manakan kayu. Kapalo tajongkek, caruah lah bareh. Buyuang nan manjongkek an, mandeh maayak tapuang duduak di tungkahan.

Di dapua, lah sudah lo alaik sala dek Upik Rukmini. Dipasiang langkueh, sumpadeh, lado, kunik, bawang putiah jo bawang merah. Maekeh Upiak ka pondok. Dicaliak lah cukuik tapuang kauntuak goreang pisang , alaik nan dibawok dilompek an ka lubang lasuang. Barubah lah rono tapuang dari putiah jadi kuniang.

Nan Yulizarni sabalun pai kalapau manjapuik alaik-alaik sala, nyo cari ka dalam palak langkueh sarato daun kunik. Lah takumpua sagalo alaik, diagian ka upik Rukmini. Sudah baginyo dek Rukimini, nan ka untuak ka ditumbuak jo ka digicih dipisahannyo.

Dilua pondok lasuang jongkek, sigus jo sihen main-main baduo. Dek main tanah jo gatah, kadang salemonyo ndak taapuih, basimpulu muko adiak-adiak nan ketekko. Sambia bamain kanai sarayo maalau ayam nan mandakek.