Ado nan sadiah tabayang dek Youag Menong, katiko talambek Si Yul baliak dari lapau. Hari lah patang, ampia bajawek jo mugarik, tapuang nan alun ta” alek” an. Tabik rabo Upik Rukimini, jo suaro kareh inyo mahariak Yulizarni nan baru manuka dari lapau.

“Iko, Piak Nyanyang ko! Lamo bana baliak kau dari lapau? Jam bara hari dikau ko?“

Merah mukonyo Yulizarni, diimbau gala nan indak inyo suko, awak sadang payah dek balari, kironyo jo berang awak disongsongnyo.

Dek hati sabana mampuduang, ditantangnya nyolah Upik Rukmini dek Yulizarni. Mato tabudua bantuak ka malulua. Sado nan dibawoknyo dari lapau dilambuikannyo.

“Ko Piak abu a! Kato kau, main-main waden. Cubo lo dikau, pai ka lapau tu!” baleh Yulizarni jo merah padam mukonyo.

Tacengang Buyuang Menong nan sadang manumbuak tapuang. Tacangang inyo karano ndak pernah-pernah Si Yul mampawakau Si Rukmini, kakaknyo. Sato berang lah pulo lah Youang Menong ka Yulizarni.

“Lah gadang Iyul komah? Lah pandai mampawakau kakak,yo!”

Mandang Youang Menong sato mambela Upik Rukmini, batambah suga Si Yul.

“Bela banalah dek Ajo adiak kasayangan ajo tu!”

Mancaracau muncuang Yulizarni, ndak takampuangan dek Youang Menong jo Upik Rukmini.

Dek ndak tahan mandanga kato-kato nan kalua, dikajanyo lah Yulizarni dek Upik Rukmini jo tangakai sapu. Mancaliak kakak mangaja, larilah Yulizarni. Tapi malang dek Yulizarni, sapu balapoh kanai pungguangnyo. Tapakiak Yulizarni maaduah kasakik an.

Tapi ndak sampai jo tangih sakik dibalehan dek Yulizarni. Inyo lawanlo Upik Rukmini. Jo tangan kosong inyo kaja Upik Rukmini sampai, ba”uli “lah inyo baradiak kakak, maegang-egangan rambuik.

Mancaliak adiak ba-uli, dilarai lah dek Buyuang Menong. Nan mandeh kanduang maluluang mancaliak, si gus jo si hen sato manangih kacamehan. Bapakiak piyauan lah urangko di pondok lasuang. Nan urang rami, lai banyak, tapi hanyo sato manonton.

Mancaliak urang tambah banyak, tibo sagan dek Upik Rukmini. Di elo e tangan dari rambuik Yulizarni, sudah itu, innyo bae balari kaateh rumah. Inyo lalu dari dapua.

Nan Si Yul takahtu pulo, sudah disibakannnyo rambuik nan lah bantuak sarang tampuo, inyo larilo masuak rumah, lewat pintu muko. Sambia taisak, Tek Kenek mangamehan tapuang jo paragaiknyo dari lasuang. Barang dikamehan, dibawok ka dapua. Nan Youang Menong, didukuangnyo Si Hen, nan Si Gus dibimbingnyo. Nan manonton pai lo katampek masiang-masing sambia bacarito apo nan dilieknyo. Tantunyo versi inyo pulo.

Dari siang ka malam, lah sudah makan malam. Si Gus jo Si Hen lah tidua lo manilantang, dikumpuanlah kasado anak dek Tek Kenek. Maangguak-angguak Tek kenek sambia mancari caro dima mulai mengecek. Dek lah lamo bakahaniangan, tatanyo lah dek Tek Kenek Si Yul. Batanang Tek Kenek batanyo, bia ndak heboh pulo beko.

“Baa kok lamo na Iyul baliak dari lapau tadi, nak?“ tanyo Tek Kenek.

Kato Tek Kenek di jawek dek Yulizarni jo manakua kapalo. Bantuaknyo Si Yul payah Manahan aia mato.. Dek ndak tatahan dek inyo lai, inyo bae mangungkuang. Jolinangan aia mato, Si yul manjawek kato mandenyo taibo-ibo.

“Ndak ambo malalaian wakatu doh, mak. Urang lapau tu bana nan lambek maagiahan. Di salasaianyo urang nan balanjo duhulu, sudah tu baru diambiaknyo pasanan amak. Apo dek kito bautang ndak, mak?”

Mandang kata Yulizarni, sato maluluang pulo Upik Rukmini, diambauannyo Si Yul, langsuang dipaguiknyo.

“Maafkan Uni, diak oi. Dek hari lah sanjo samak-samak pangana Uni, tabik rabo Uni ka Iyul. Ndak tahu Uni, takah itu nan tasuo dek Iyul doh, diak.“

Tapacak aia mato Youang Menong mangana parasaian inyo baradiak kakak samaso dahulunyo. Kini badanlah barazaki, taniaik pulo nandak pulang kampuang, nandak manyanangan hati mande jo adiak-adiak. Tapi jalan ka kampuang lah tahalang pulo.