Parasaian Irma Gusneti

Badan nan sadang dirintang-rintang hari, pangana jauah pulo ka subarang, tadangalah bunyi suaro urang maimbau dek Si Gus. Dek dareh suaro urang maimbau, tadanga dari baliak jendela kamar, takacabuang Si Gus. Ditinggaan anak nan tadinyo diulikkan, bajalanlah Si Gus lambek-lambek. Supayo ndak tajago anak ketek nan sadang lalok.

“Astaga. Uni! “

Takajuik Si Gus mancaliak kakaknyo nan banamo Yulizarni, nan marantau di Jambi, batigo baranak, tagak di janjang rumah.

“Bukak an pintu capek, Gus!” kato Si Yul dek mancaliak Si Gus tagana sajo dari baliak bintu.

“Uni? Jadi juo uni pulang?” tanyo Si Gus nan heran karano dek Korona, Yulizarni lah mambatalkan pulang kampuang.

“Baa Uni ndak ka pulang, diak. Panjang muncuang amak beko. Buka an lah pintu tu capek a. Bawok an tas ka dalam, semprot jo desifektan! Untuak sahari kini, salangan uni daster Si Gus! Baju Uni lansuang randam, dih!” kato Si Yul mamarintah.

“Ka isolasi mandiri, Uni?” tanyo Si Gus karano parintah Si Yul lah co urang kanai korona

“Kato Kau terjangkit virus, Waden,” baleh Yulizarni.

“Karantina, mukasuik ambo. Salah sabuik ambo. Uni ko marabou sajo.”

Dalam pikiran Si Gus, babahayo manarimo urang baru tibo. Tapi kok kaditolak, nan tibo kakak awak. Inyo pulang juo karano ado acara awak. Basaba hati Si Gus, dituruikkannnyo sagalo parintah Si Yul.

Dibukakannyo pintu biliak dek Si Gus, masuak lah si yul batigo baranak. Di antaan nyolo daster dek Si Gus ka biliak. Dicowangan lo baskom palatakan baju nan sudah dipakai dek Si Yul batigo baranak. Tas jo bakeh jalan nan baru tampuah di semprotnyo lo.

“Gus, di oto ado bungo hiarwarmani, latakkan di tampek nan taduah,yo! Siram sakali! Hati-hati! Jan sampai mati bungo tu! Maha tu mah,” kato Si Yul sambia manutuikkan pintu kamar.

“Iko, kakak nan surangko, baru pulang lah eboh jo bungo. Ndak tantu dek inyo, kini pandemi,” kato Si Gus dalam hati.

Ndak namuah Si Gus manyolang kato Si Gus langsung doh. Beko kalau disolang, panjang muncuang Yulizarni. Ndak takampuangan dek Irma Gusneti.

“Nte, ambilin air! Aku haus!”

Si Hosen anak Yulizarni dari dalam biliak, lah sato pulo mintak tolong. Dek Si Gus, asal lai namuah di karantina, bialah ko ka latih ghai, di turuikannyo sagalo kandak.

Dikamehannyolah sagalo pambawoan Si Yul dek Si Gus, tamasuak bungo Hiarwarmani nan ndak ba batang, badaun kamerah-merahan. Mancaliak bungo, badatak hati Si Gus, indak ghai iko namo bungo ko doh. Ba gaya-gayaan awak, bia urang batanyo di ma babalinyo.

Samolo wakatu pulang kapatangko, banamoan bungo karataih nan banyak warna tu di Si Yul, Anismawar Yenthree. Sampai tangago kawannyo nan banamo Si Mimi, Upik Zarani lah mangeleang-geleang pulo.

“Gus, ambiak an anduak!”

Apo kolai?

Dari kamar mandi ado urang maimbau. Didanggan dek Si Gus, takah suaro kakaknyo Upik Rukmini. Balari lo Si Gus maambiak an anduak nan tajamua di ampaian kain.

“Ndak jadi Uni ka Pakanbaru doh?” tanyo Si Gus

“Si Pial kanai ambek dek polisi di kelok 9. Ndak buliah oto masuak ka Sumatera Barat, doh. Baliak kanan inyo baliak,” jawek Upik Rukmini nan mangatoaan, oto nan di bawo anaknyo nan banamo Sofialdi, nan sadionyo ka manjapuik Upik Rukmini ndak jadi tibo.

“Di ma Uni bamalam patang?” tanyo Si Gus karano Upik Rukmini sajak patang lah pai dari rumah.

“Di rumah mintuo Uni. Sangko Uni, ado Buyuang Barat nan kamanumpangan. Kironyo inyo, pasiang bulo la iciang pulo pai ka Soret,” baleh Upik Rukmini nan ndak jadi manumpang jo adiak ipanyo nan banamo Buyuang Barat. Padohal itu hanyo namo gala sajo karano bantuak ipanyo itu, lah sarupo jo urang barat.

Sadang Si Gus jo Upik Rukmini maota, tadanga urang kuhua kahak, basaratoaan lo jo batuak badangkong dari biliak pafiliun.

“Batuak sia tu Ni?” tanyo Si Gus ka Upik Rukmini.

“Namuah lalok sajo kau dari tadi. Indak tau baghai, ajo kau alah tibo dari Surabaya. Kini bakuruang di biliak dapua,” jaleh Upik Rukmini..

“Ajo Buyuang Menong?” tanyo Si Gus sarato jo takajuiknyo sakali.

Mukasuik hati manangkok ikan panjang,

kironyo nan dapek si lauak limbek.

Kok di rantang namuah panjang,

Dicaritoan sajo saketek-saketek.

Langkoknyo ado dibuku nan mbo karang

Kampuang baru jo kampuang gadang,

salingkuang nagari ampek angkek

Carito Youang Menong nan ambo karang,

kok salah kato tolong dimaafkan.

Pariaman, 21 Mei 2023