Irwanto, M.Pd

Sungai Pinang jo Sungai Nyalo.

Tampak nan dari Kapo-kapo.

Kito sambuang carito nan takarangko

Jalan manurun Zamri basamo-samo.

Manurun di jalan bukik barumpuik nan curam, haruihlah bahati-hati. Jan sampai tadohok badan, beko bagolong jatuah ka bawah. Takahtu nasihaik dari Khaidir manuntun kawan-kawannyo jalan manurun pulang dari Aia Tajun Pelangi.

Dari sabanyak nan pai, Si Mimi jo Si Fit lah nan lah paliang pandai manurun. Lamak tepok-tepoknyo jalan manurun, basipacik ka rumpuik lia nan baaka kareh. Dek Zamri pantang kalah, dicubonyo pulo manurun indak basipacik. Lupo inyo baru cegak dek saraf tajapik kapatangko. Kironyo tagedeang Zamri.

Payah inyo manahanan barek badan sehinggo tasinjaja balari ka bawah. Untuang ado batang manggih nan bakasin, langsuang manggadapang sajo inyo ka batangtu. Tadangek paruiknyo dek tahampeh ka batang kayu. Tapakiak induak-induak nan sempat mancaliak baa caro maluncua Zamri. Dek Khaidir di sorakannyo jo garah.

“Oi, Zamri! Lai ado juo waang lai?’ Sorak Khaidir dek Zamri ta anok Manahan sakik, tatahan di batang kayu sagadang pangka langan.

Dek payah maelo angok, indak disauiknyo sorak Khaidir dek Zamri. Sambia Manahan sakik, dipiciangannyo mato, dihelonyo angok lambek-lambek. Lah hilang sasak angok, dicubonyo mambuka mato, kironyo baputa bumiko taraso.

“Lai ndak baa Si Zam, tu? Kajalah ka sinan Mak Itam,” kato Si Nel kacamehan manyuruah Mak Itam manolong Zamri.

“Inyo babudi tu mah, Nel,” jawek Mak Itam santai.

“Sumbarang sajo Mak Itam, ko,” kato Si Devi nan sato cameh lo mancaliak.

“Nan jalaih kito turun dulu elok-elok. Bia Khaidir nan manolong Si Zam,” kato Datuak Napi dek lah pado taanti bajalan mancaliak Zamri tasangkuik.

Samantaro Datuak jo nan lain turun bahati-hati, Khaidir basalosohan turun ka arah Zamri. Diraiahnyo badan Zamri nan masiah tagantuang di Batang Manggih, dibawonyo turun sampai ka bawah bukik, tibo dibawah ditilantangannyo.

Mancaliak Zamri masiah taaniang, badugo panik nan induak-induak nan alah tibo di bawah. Ado nan ma uruik kaki jo tangan pakai minyak angin, adolo maghusuak palipis Zamri. Nan Mak Itam tagak sambia mancaliak lamo ka muko Zamri. Mancaliak caro maangok Zamri takah urang biaso, badatak hati Mak Itam Zamriko icak-icak pingsan.

“Maindalah induak-induak ko dulu, yo! Bantuaknyo Zamri ko harus diagiah napas buatan,” kato Mak Itam mandakek ka arah kapalo Zamri.

Zamri nan hanyo babudi, dalam tapiciang tanpak mambayang Mak Itam nan bantuak ka manyongoh ka mukonyo. Apolai angok baun patai lah manyasak lo kaiduangnyo. Sakatiko itu langsuang manggaletang Zamri, inyo lansuang tagak.

“Mak Itam ko, ndak sanang jo hatinyo mancaliak awak dikarubungan induak-induak,” kato Zamri bajalan babarapo langkah.

Mandanga kato Zamri, galak takikiak Mak Itam. Induak-induak nan banyak badugo maaariak berang ka Zamri. Ndak hanyo berang, tapi galigaman. Si Nel mamiyuah pinggang Zamri hinggo takaluak, Si Devi malapoh paho Zamri sahinggo balapik, Si Fit jo Simimi manutuah bahunyo, Si Evi didabuih gadangnyo pungguang Zamri sahinggo kaluak-kaluak minta ampun. Hilang cameh baganti jo garah, garah urang bakawan-kawan samo gadang.

Mancaliak lai ndak baa-baa, Syahmanis manjuju sajo di jalan satapak nan dituruikannyo dek Sofialdi. Dek sapanjang jalan Syahmanis masih mangambok, di cubo batanyo dek Sofialdi, tapi nan ditanyo indak manjawek. Bakato-kato suranglah Sofialdi apo salahnyo ka Syahmanis.

Indak lamo pado itu, sampai lah urangko kasadonyo di pondok tanpek oto nan ka ditompangan wakatu ka masuak jalan manjalajah ka Aia Tajun Pelangi. Di pondoklah duduak minum kopi Jang Eric nan dikawanan dek surang padusi. Mancaliak Jang Eric maota jo induak-induak tu , di sorakannyo dek Zamri

“Oi, bini urang tu mah!”

Sumpayang aianyo sirah.

Ambiak ka ubek paneh dalam

Diminum pagi jo patang.

Niaik di hati lai ka sampai sudah

Kironyo lah panjang tulisan halaman,

Tapaso dikarangkoan takah kapatang.

Maaf kolau ado kamiripan namo jo carito. Nan carito murni dikarang-karang sajo, kaganti manjalang dek tingga kito bajauahan. Tarimokasih, Sanak. Dek hari kapuaso bari maaf ambo kalau ada salah jo jangga. Salamik manjalankan ibadah puaso. Semoga banyak berkah untuak kita dibulan puaso iko. Wassalam.

Piaman, 11-04-2021