#TantanganGurusiana ke 246

#Kolom

Siang tadi, hari lai lumayan sajuak, lai ndak paneh do. Tapi sajak mandanga harago minyak naiak, kapalo Udin taraso sakik bana. Labiah lo padiahnyo lai dari pado bapaneh-paneh. Katiko batamu jo ambo di tampek pos rundo tadi tu, nyo mulai mancaracau. Tapaso ambo dangakan sajo.

Baa ka indak, iduik lah susah, keceknyo, tu kabantambah susah juo lai. Kamanga wak ko lai, harago minyak lah naiak. Kalo harago minyak lah naiak, harago nan lain lah kasato pulo naiak tu ma. Tantu rang rumah ka mintak tambah pitih balanjo pulo, baitu juo jo anak-anak.

Onde mak oi,...baa ko lai. Onda lamo lai masih ado, tapi pambali minyak lah payah. Tapaso tagak kakai duo onda ko lai. Apo gunonyo lai, ado bana Onda tu, ndak baminyak tantu ndak bisa bajalan do.

Jo apo kabajalan lai pai karajo. Karajo ka bukik, mancaghi upah ka ladang urang, jauah lo dari rumah. Kareta unto nan dulu lah rusak pulo, rantai putuih, ban jo benan ndak bisa dipakai lai. Kok ka di servis lah gadang pokoknyo. Pitih tu bana nan indak ado.

Kok kabajalan jo, ndak talok de, kaki jo pinggang lah mulai sakik. Indak ka pai karajo, ndak dapek upah do, jo apo anak bini ka makan. Lah sansai awak ko maaa....

Kecek ambo, ndak awak jo nan maraso co itu do. Banyak nan lain, manga mancaracau juo. Baok lalok lu Din, beko kalo lah jago kok lai tumbuah pangana elok.

Laloklah Udin di pos rundo tu. Tantu ndak mungkin lo ambo kamancaliak an inyo lalok do. Katiko inyo lah lalok bakaruah, ambo pulang lai. Dalam pangana ambo, kok ka lalok pulo manga di siko, rancak lah di rumah lai.

Kao lah lai Diiinn....!!

#BerlatihTerusMenulis

03/09/22