Pagi bute cang Lihun udah keluar rumeh. Biase, sholat subuh jamaah di mushollah kampung. Cang Lihun sesuai namenye, Solihun. Orangnye sholeh banget. Hampir enggak ade celanya. Disenengin banyak orang. Santun tuturannye. Biar begitu, tetep blak-blakan kalo udah ngomong. Bener tetep dibilang bener. Salah tetep dibilang salah. Mangkenye banyak warge yang suka minta solusi kalau lagi ade masalah.

Setelah sholat subuh, biasenye sih enggak langsung pulang. Ngaji dan ngopi dulu di mushollah. Kong Naim emang paling kesohor dah soal kopi. Selain sebagai tuan guru, kopi buatannya paling enak. Jamaah betah. Mungkin ini salah satu trik dakwah kong Naim. Biar warge mau sholat subuh jamaah dan ngaji setelahnye. Satu lagi, tiang guru Naim lebih sreg kalau warge menyebutnye dengan kong Naim. Tawaddu banget dah. Enggak ade sombong-sombongnye biar sedikit juge.

Topik ngaji kali ini soal nyerobot taneh. Nah, ape dikate, topik ngajinye kong Naim emang rade beda. Membumi, kate orang. Fekih muammalah, begitu istilah yang disampein kong Naim. Cang Lihun membuka taklim dengan penuh semangat.

Kong Naim ngejelasin terstruktur, runut sehingga jamaah bise paham.

Tiba deh sesi tanya jawab. Kong Naim bilang, sabar ye, nyeruput kopi dulu. Tenggorokan rada seret. Jamaah juga ikutan nyeruput setelah disilakan kong Naim.

"Ayo dah, waktunye nanye nih, silakan jamaah yang mau tanye" Cang Lihun menyilakan jamaah sambil plirak-plirik liat siape yang mau tanye.

"Mau tanye nih kong Naim, aye orang baru di kampung enih, Gufron name aye. Tinggal di sebelah rumeh Cang Lihun. Jadi, kalo kite nyerobot taneh orang biar cuman sedikit, biar kate satu senti tetep dose ye. Kayak aye, peger rumeh makan jalan umum, pegimane tuh kong?"

Kong Naim serius dengerin omongannye Gufron.

"Bener sekali bang Gufron. Kite sebagai muslim kudu jadi contoh. Jangan seenak udel betingkeh. Selama itu bukan hak kite, haram kite lakuin. Bukan cuman tanah tetangge, tanah yang jadi fadilitas masyarakat juga jangan kita akuin punye kite atau kite pake untuk kepentingan pribadi, bae nyari untung atau sekedar dipake pribadi" jelas kong Naim kemudian brenti sebentar, nyeruput kopi lagi.

"Nah kalo dibiarin terus, bise jadi perang dah tuh. Konflik sosial antar warge, antar tetangge. Misal nih, enggak punya lahan parkir mobil tapi punye mobil. Akhirnye jalan umum dipake buat parkir. Kalo ini dibiarin terus, bise meledak konflik di masyarakat. Fenomena ini, pan sekarang udah banyak terjadi. Banyak mobi yang parkir di jalan sebab enggak punya lahan parkir, bener kagak?"

Gufron nyengir. Pas banget sama die. Mobilnye ngendon di jalan sebab enggak ada garasi.

"Jadi itu saleh ye, kong?" Tegas Gufron buat mastiin pemahamannye.

"Jelas saleh, itu yang make tanah negare, apelagi nyerobot taneh tetangge" kong Naim lebih menegaskan lagi.

"Nauzubilahi mindzaalik, nerake balesannye" kong Naim ngelanjutin penjelasannye.

"Pegimane dengan kasus serobot taneh di Pluit, kong?" Salah satu jamaah nimpalin penjelasan kong Naim.

"Nah, itu contoh soal yang kagak boleh ditiru. Nyerobot tanah negara buat yari keuntungan pribadi. Kenape bise terjadi? Ade dua pihak yang saleh menurut saye, pertame warge yang nyerobot taneh itu. Kedue, pemerentah yang ngebiarin penyerobotan itu. Kasusnya baru meledak setelah ade warge yang protes, kebetulan ketua RT. Seharusnye kagak jadi soal kalau same-same sadar hak dan kewajiban. Kemungkaran akan merajalela kalau dibiarin. Mangkenye saling nasehat-menasehati itu kudu dilakuin. Tentunye dengan cara yang bae"

Bener juge. Pade akhirnye kalau dibiarin bise timbul konflik antar warge, seperti kasus Pluit. Belum lagi ade orang yang jadi kompor, tambah berabe dah.

"Kesimpulannye ye, kite sebagai muslim dilarang menyerobot yang bukan hak kite bae bertetangge maupun bermasyarakat. Bae milik tetangge maupun milik negare" Cang Lihun menutup pengajian dengan kesimpulan.

Jamaah melanjutkan kongkow-kongkow pagi yang berkualitas sambi nikmatin kopi dan goreng singkong. Musholah jadi rame setiap ahad pagi.