Bakri lagi ngejogrog dipojokan, kopi secangkir die seruput. Kagak peduli sama temen-temennye yang lagi super serius. Bodo amat dah. Penting nih kopi udah lewat tenggorokan.

"Bang, kayaknya enak banget tuh nyeruput kopi" Darto nyelak.

"Ngantuk banget, Ustadz!" Jawab Bakri sambil terus ngegayem singkong rebus toping keju.

"Et, dah bujug. Narasumbernya mah keren menewen, cuman tuh kurikulum bikin ngab, ampe mata sepet!" Bakri mulain muntahin kunyahan materi ini malem.

Bu Azizah nimbrung.

"Iya, bang Bakri. Saya juga jadi puyeng. Kurikulum yang lama aje belon paseh, eh ini udah keluar ponakannye!" Bu Azizah sambil mesam-mesem.

"Jangan kompor dah mpok jizah" Darto nimpalin

"Iye, mpok Jizah. Jangan jadi kompor minyak, mending kompor gas, hehehe74x" Mugni malah nyundut petasan.

"Bukannye sih gue kagak terime tuh prototipe, Daro, Mugni. Heran aja. Tuh masih banyak belon paham kurtilas, apalagi khatam!" kesundut beneran Bakri.

Darto sok paham.

"Sebenernye nih bang Bakri. Bukannye saye lebih ngerti. Saye yakin udah melalui diskusi panjang para pakar. Kayak yang dibilangin narsum, kurikulum ini katanye kebih asyik. Mangkanye ada sekolah-sekolah yang dijadiin piloting. Nantinya pan dievaluasi lagi"

"Ah, sotoy nih pak Darto!" Bu Azizah ngenye.

"Ya, coba bu Azizah, apa pendapatnya tentang kurikulum prototipe?" Suara narasumber ngagetin.

Bu Azizah gelagapan. Bakri ngumpetin mukanye sambil nguyup kopi.