Di zaman nan samakin modern ko yo banyak nan ganjia nan dicaliak.  Kalau ka jalan raya awak  malinteh baragam  pamandangan nan nampak. Ado urang bao motor gadang  yang jok nyo manungiang kamuko, kalau ado nan dibelakang duduaknyo bantuak gaya urang katakutan . Mandakek  ka  pengendara sambia mamacik arek ka pinggangnyo  bantuak ndak dapek dipisahkan lai. Ado anak bujang yang mambao motor surang se bantuak dikaja setan lari motornyo, sarato jo bunyi motor nan mamkak talingo.  Kok ado urang tuo nan  sakik jantuang bantuak ka pai sajo lai dek mandanga pakik motor anak mudo nan sangek kareh  malankiang ka talingo .

Kalau hari sabtu awak banyak mancaliak anak sakola  SLTA antah dari mano datangnyo pakai seragam baju olah raga nan bapasang pasangan jo motor  duduak mangangkang babocengan di balakang. Bantuak  urang katakutan mamacikan pinggang nan  laki laki yang mambaok  motor, padohal lari motornyo santai se nyo. Bak kecek urang lari motor 50 paguiknyo 150, dek  sangek areknyo. Kok tibo jo anak gadih awak  sangeklah ka malu wak deknyo, untuang anak gadih wak masih balita. Nauzubillahi minzaliik.  Antah dek pangaruh tontonan media hilang raso malu dek maniru gaya urang. Alah hilang raso jo pareso manurukan zaman nan samakin manggilo.

Awak sabagai guru turuik malu , maraso ndak berhasil  mandidik anak tantang akhlah jo budi pekerti. Kadang mancaliak pamandangan rang mudo kini raso kanai tampa mungko wak guru dek masyarakat.  Tapi kalau disampaikan ka urang tuo ado pulo urang tuonyo nan maraso itu wajar sajo. Awak pernah pulo dulu mudo tapi  ndak bantuak itu caro  bagaua jo laki laki do. Apolai itu ndak muhrim wak. Alah hilang sajo  petuah petuah rang tuo untuak gadih minang  yang tasabuik “ sosok yang mempesona dan santun”.  Padusi minang nantik ka manjadi bundo kanduang, limpapeh rumah nan gadang. Artinyo nasib zaman akan ditantuan jo padusi. Kalau padusi elok, mako elok pulo zamannyo. Mako nyo awak sabagai guru maimbau pado  urangtuo, jago jo paratianlah anak gadih kito pergaulannyo, jaan sampai dek talampau bebas mambuek malu kito jadinyo.

Wallahu ‘alam..

Saniang baka solok, 9 agust 2020