Menuju tantangan 365 hari

Hari ke-156

#TantanganGurusiana

*

Tasapo

*

Alah manjadi tradisi dek nan mudo-mudo bajalan pagi sasudah sumbayang Subuah apolai kalau Minggu pagi labiah rami urang nan pai. Itu pulo nan dilakuan dek si Ranti sarato kawan-kawannyo nan samo sikola jo inyo di Aliyah (MAN) duo tahun nan lapeh.

Alah panek bajalan, alah siang pulo hari, paruik pun alah mintak diisi pulo. Singgah lah si Ranti jo kawan-kawannyo ko ka kadai katupek Uwo Leka nan tasabuik lamak Katupek Gulai Pakunyo. Apolai kalau ditambah pulo jo Sala Lauak, ondeh, indak tabado lamaknyo, bapaluah iliean awak dibueknyo.

Sasudah sarapan jo Katupek Gulai Paku di lapau Uwo Leka tu, si Ranti sarato konco-konconyo cako malanjuikan jalan paginyo sambia nanuju ka rumah masiang-masiang. Tapi di tangah jalan batuka niaek mereka tu. Mereka barencana nak pai mandi ka Lubuak Bunta, tampek pamandian alam nan ayianyo janiah cando mato kuciang. Baa kan indak Lubuak Bunta tu lataknyo di kaki gunuang gunuang Tandikek.

Untuak sampai ka Lubuak Bunta ko Ranti jo kawan-kawannyo masih basumangaek jalan kaki. Karano jaraknyo kiro-kiro 2 kilometer dari tampek mereka ko.

Kiro-kiro pukua 10.00, tibo si Ranti jo rombongan di Lubuak Bunta. Mancaliak janiahnyo ayia, basigageh urang ko mandi barami-rami. Sanang bana hati urang tu barandam. Indak taraso alah pukua 12.00 jo hari. Karano lah tangah hari baranti mereka mandi lai.

Sasudah basegeh-segeh si Ranti pulang, tapi ndak takao bajan lai Karano paneh lah angek bana. Diseyo lah ojek supayo bisa capek tibo di rumah.

Indak lamo sasudah tu si Ranti maraso badannyo angek, saraso nio muntah, sampai patah salero bagai. Kecek amaknyo si Ranti tasapo di Lubuak Bunta karano mandi tangah hari. Tapi herannyo baa kok si Ranti sorang jo nan damam, konco-konconyo ndak baa-baa doh.

Batanyo si Ranti ka amaknyo, "Apo tasapo tu, Mak. Sia pulo nan manyapo?".

"Tasapo dek setan. Itu makonyo jan malala juo tangah hari. Kasudahannyo kan Amak juo nan susah", Jawek Ande Suma amak si Ranti.

Dek amaknyo si Ranti dibao barubek ka dukun kampuang. Diagiah si Ranti ubek tasapo barupo kunik nan dibalah duo. Sasudah dibacoan panawanyo, kunik tu ditulihan ka kaniang jo pungguang tangan si Ranti.

Alah duo hari sasudah barubek, si Ranti alun juo cegak lai. Nampanyo ubek dukun indak mangkuih. Sahinggo Abaknyo turun tangan. Dibaonyo si Ranti ka Mantari Bahar barubek. Dari Mantari ko lah si Ranti jo Abaknyo dapek pencerahan tantang tasapo ko. Kecek pak Mantari indak batua adonyo tasapo tu doh. Si Ranti damam dek karano badannyo sadang lamah, sudah bapaneh-paneh lansuang pulo mandi, ditambah pulo sasudah mandi barangin pulo naiak ojek. Sahinggo lah basaratoan sadonyo. Itulah panyabab damam si Ranti.