#tantanganharike_89 #tantanganmenulismediaguru Mak Topik nan sadang ma ota lamak jo Mak Ijo, maraso tagaduah talingonyo mandanga suaro anak manangih. Manangih ndak sumbarang manangih do, tapi manangih sambia bailau-ilau. Suaro kareh pulo mode belek digua. Lai tau sanak baa bunyi belek digua? "Indaaaak," jawek kaleng roti nan lah mulai kosong. "Elle..lah jaleh awak nan urang ota an ndak pulo maraso...ha ha ha..." "Baa Tek Nun ko? Batanyo urang bagalak an. " "Jaleh belek tu kamu. Tu batanyo lo," jawek Tek Nun sambia galak. Dek samakin didanga an samakin kareh ilau anak tadi, kalua lah Mak Topik. Karano iko bana nan pantangan dek Mak Topik. Ndak bisa mandanga an anak manangih. "Sabanta, Mak," kecek Mak Topik ka Mak Ijo. Kalua lah Mak Topik bagageh-gageh. Sampai-sampai sasek pulo mamakai tarompa. Nan sabalah suok talakek an ka kaki kida. Tapaso lo ba tuka dulu. Nan tangih anak tadi samakin manjadi-jadi. Baru sajo balik kanan, ruponyo nan manangih anak Mak Ijo. Fajar, anak kaduo Mak Ijo. Manangih sambia mangusau-ngusau kasiak di laman rumah. Mak Topik langsuang mandakek. "Oi manga ang mangih, Jar?" Tanyo Mak Topik sambia manapuak bahunyo. "Pitih den ilang di siko?" "Bara pitih ang ilang?" "2000, sambia taruih manangih. "2000?" "Iyo, hu hu hu, sambia ma uyu-uyu. Dek mandanga pitih paja ilang duo ribu, nan Mak Topik cako langsuang bakaruak saku-saku jeket. Dek lai duo ribu. Kok duo puluah ribu mungkin ba imbau an ka Mak Ijo. He he he ... "Ko a, ko ganti e a," kecek Mak Topik sambia ma agiah an pitih karateh duo ribu. "Hu hu hu hu...."nan anak tadi ndak juo baranti manangih. Mak Topik tambah heran. Pitih nan hilang lah diganti. Tapi nan tangih ndak juo baranti. Naiak lah spaning Mak Topik dibueknyo. "Kok manangih juo ang baru? Tapi lah den ganti?" Tanyo Mak Topik saketek emosi. "Kok ndak hilang pitih den, lah 4000 pitih den," jawek si Fajar sambia marawuang gadang. "Yo lah ngango ang mah," jawek Mak Topik jo esmosi tinggi. Baitu lah sanak. Jan disangko anak ketek ndak baraka, labiah panjang pulo aka nyo dari jembatan aka lai. Sangko Tek Nun dek lah baganti pitih nan ilang tadi, ka antok tangihnyo, batambah kareh nan lai rawuangnyo. Malah nan lain pulo nan tabayang dek anak ko. "Kok ndak ilang pitih den, kan jadi ampek ribu pitih den." 🤣🤣🤣 Ha ha ha ... dasar bocah edan. Calon rentenir milenial. Tabasuik galak wak manonton video Mak Topik🤣🤣🤣 #virusbahagia #menulisitusedekah #menulisitumenyembuhkan