Ramadhianty

Assalamualaikum warahmatullahi wabarakatuh..... Salam kenal sahabat literasi semua... Perkenalkan saya: Ramadhianty, SS Bertugas di SMKN 2 Solok, Kota Solok...

Selengkapnya
Navigasi Web
Gulai Kamumu

Gulai Kamumu

#Tagur151

Gulai Kamumu ..

" Kamumu dalam samak

Jatush malayang salarehnyo

Meski ilmu satinhgi tagak

Indak Sumbayang apolah gunonyo"

Bait pantun nasehat ko maingekan katiko harajo pantun palajaran Bahasa Indonesia. Pantun ko tamasuek pantun nasehat. Tapi tulisan kini ko indak mambahas masalah pantun tapi nan kadikaji tu tantang kamumu sabagai pokok persoalan.

Ka pasa pagi tadi katiko mambali lado, tomat jo bawang. Di sabalahnyo ado amak-amak nan manjua kamumu. Langsuabg taragak mambuek gulai kamumu ko. Apolae kok dicampue jo sayok , tu ceker samo tulang lihie ayam. Ndak paralu jo dagiangnyo do, cukuik jo bagian nan tulang-belulangnyo sajo. Lah tabayang lamak jo manieh raso gulai kamumu ko.

Biasonyo gulai Kamumu ko acok dibueknyo dek urang atau jadi samba kagadangan kalau urang baralek karaie paja alias turun mandi. Gulai Kamumu ko wajib ado walau agak saketek patando di rumah si pangka sadang ado alek karaie paja.

Marilah dieksekusi kamumu ko manjadi gulai untuk makan siang hari ko.

Bahan :

1. Kamumu sakabek

2. Karambie sabuah dikukue, diambiek santannyo. Kalau sanak nio mambali santan nan siap bulieh juo.

3. Langkok-langkok daun, sarupo daun kunik, sarai, daun salam, daun limau, daun ruku-ruku tambah jo asam kandih sacukiknyo.

4. Langkok bumbu giliang, ado langkueh, supadeh, kunik jo lado giliang agak saketek. Kalau padeh indak lamak gulai kamumu ko do.

5. Bawang merah jo bswang putieh nan diiris haluih.

6. Trus garam, panyadap raso sasuiai salero

7. Nan indak bulieh lupo parancahnyo tadi, sayok-sayok ayam, ceker, tulang lie, tulang kapaknyo bagai.

Caro mambueknyo:

1. Masukan santan ka dalam kuali atau pariiuek. Sasudah tu masukkan daun-daun langkok kecuali asam kandih.

2. Hiduikkan api kompor ndak usah gadang bana. Aduek taruih santan ko jan sampai pacah ruok.

3. Masukkan bawang merah jo bawang putieh sarato langkok giliang.

4. Kalau alah manggalagak santan tadi, sambie diaduek taruih, masukkan kamumu nan alah diiris tipis sarato alah dicuci barasieh. Jan lupo peras agak saketek bia aie cuciannyo indak tabaok ka dalam gulai.

5. Taruih diaduek sampai kamumue alah layue jo indak badarueh kalau dimakan.

6. Sudah tu masukkan sagalo namo tulang ayam tadi kadalam gulai baru agieh asam kandih.

7. Agiah garam, penyedap raso sesuai jo salero. Kicok dulu baa rasonyo alah badaceh atau alun sambie taruih diaduek.

8. Kalau alah baminyak gulai kamumu tadi, matikan api tu aduek agak sakali-sakali. Gulai siap dihidangkan.

Baa kok parancahnyo sagalo nan nan banamo tulang ayam. Tu dagiangnyo kama? Khusus untuk dagiangnyo kito goreng balado jo jariang. Bia badaceh makan siang nan agak lambok-lambok ko udaronya karano sabanta lae bantuek ka hujan...

Solok, 04 Juni 2023...

DISCLAIMER
Konten pada website ini merupakan konten yang di tulis oleh user. Tanggung jawab isi adalah sepenuhnya oleh user/penulis. Pihak pengelola web tidak memiliki tanggung jawab apapun atas hal hal yang dapat ditimbulkan dari penerbitan artikel di website ini, namun setiap orang bisa mengirimkan surat aduan yang akan ditindak lanjuti oleh pengelola sebaik mungkin. Pengelola website berhak untuk membatalkan penayangan artikel, penghapusan artikel hingga penonaktifan akun penulis bila terdapat konten yang tidak seharusnya ditayangkan di web ini.

Laporkan Penyalahgunaan

Komentar




search

New Post