#T.017

Hujan Sadirok..

Disangko paneh sampai patang, kironyo hujan tangah hari. Sabarih kalimat lagu minang nan indak asiang lae didanga dek talingo. Lagu nan bacarito masalah putuih bacinto. Tapi nan tadi tako iyo sabananyo. Dari pagi indak tabedo paneh badangkang. Raso-raso indak ka sampai puaso hinggo sanjo. Karangkungan iyo sabana kariang ko.

Lah dibae bawudhu kamangarajoaan sumbayang luhue. Nan matoari iyo sadang manjadi. Baru kamamakai kain tilakuan tibo-tibo hujanangatutuah tibo. Indak pakai tando-tando bagai do. Langsuang label bana ko cando aie dituntuangkan turun dari langik. Bakaja-kaja ka sado alahe dibueknyo. Padi sadang takaka dijamuran tangah laman. Nan kain indak tabedo lo tajamue dijamuran.

Indak takaja maangkek jamue padi lae dibueknyo. Dipadiakan sajo tabantang tangah laman tu disaok jo lapiek panjamuran. Nan kain lae takaja juo dibangkiek. Baru taangah diateh rumah, hilang mangirok hujan nan saban jadi labeknyo tako. Nan palueh alah bakacucuran di badan. Paneh maulangnyo baliek sajadinyo. Hujan nan sadaro tako antah kama hilang manguoknyo. Iyo indak bisa dibaco tando-tando alam ko. Indak bulieh picayo bana awak dibueknyo jo apo nan nampak dek mato.

Solok, 31 Maret 2024....