"Hey, teman-teman, besok kita kumpul yu ngariung di rumah ekeu." Kitu ajakan Eci dina WA na. Ngajak sobat-sobatna saparakanca

"Oke, kita kemon. Jam berapa bray ke hum nya?" Ceuk Teh Isah mairan ngabales WA na Eci. Biasa si eta mah sok gagayaan make basa inggris nu teu merenah tea

"Jam sapuluh lah nya!" Tembal Eci. Maheutkeun jangji.

Teh Isah sabalad baladna jangjian rek ngumpul ngariung di imah na Eci, maksudna mah rek gunem catur nyawalakeun acara ngalongok neng Pitri, ceuk beja Neng Pitri teh danget ayeuna nuju teu damang. Henteu meureun ari wales mah da masih bisa 'beraktipitas' ngalaksanakeun tugas sapopoe na, nyaeta ngajar pripat jeung ngeles disalah sahiji lembaga bimbel. Tapi ari pareng rek dilongok, Neng Pitri sok siga nu nolak. Siga nu embung kadatangan, aya we alesanana teh. Aya ngajar tea, aya budak nu menta les pripat tea, atawa nganteur indungna ka pasar, jeung sajabana. Antukna Teh Isah sempat boga pikiran, ah ieu mah akon akon wungkul supaya babaturanana teu jadi datang ka imah Neng Pitri. Nyeta duka kunaon tateh ti saprak harita Neng Pitri teh rada linghas, mun diajakan kumpul kumpul teh.

Kira-kira wanci jam sapuluhan Teh Isah jeung sabatur-batur na geus anjog ka tempat anu geus di patotoskeum ti kamari na keneh, di gang leutik di jalan campaka. Ti dinya ting belenyeng naraek motor boboncengan duaan duaan. Biasa lah 'baiker' (biker.red) cenah. Di satengahing perjalanan, Eci nyimpang heula ka kios baso nu aya di sisi jalan, jalan Sampurna. Bet kabengbat ku baso sagala, ma'lum harita wanci geus jam sabelasan beurang, keur meumeujeuhna lapar. Der kabehanana tarurun paresen baso sewang-sewangan.

"Mang, dibungkus mang, lima. Nu hiji campur pake baso urat, nu hiji bihun toge sayur baso urat, nu hiji bihun toge baso urat, kade tong asin teuing, da aya nu selera teu uyahan, rada manis weh, nu hiji deui..... Heh, Isah pake naon wae tuh?" ceuk Eci ngagorowok ka Teh Isah nu keur anteng ngobrol jeung Ega.

"Oh, iyess siyaap lah. My uncle, I am pake baso urat sama Shoes chicken, yesss! Emihna tong seueur teuing, eta we tah pake siomay tahu. Sing lada nya my uncke" Teh isah pertentang pesen baso ka si emang bari loba pamenta, jeung make basa inggris sagala dicampur. Dasar tukang ngabodor teu dimana teu dimendi ngan ngabojeg we. Tapi keun lah itung-itung hiburan haratis.

Sarerea nu ngadangu pesenan Teh Isah marolotot mata simeuteun puguh ge heran tayohna mah, ka asup si emang baso na oge bengong teu ngarti naon nu dimaksud ku Teh Isah. Eta pangpangna mah make nyebutkeun 'shoes chicken'.

"Naon shoes chicken teh Isaaaaahh?" Eci nanya bari kitu na teh ngadegungkeun sirah Teh Isah.

"Tuh si emangna ge teu ngartieun. Tong loba gaya lah!"

"Apa ai kamu ih cie, sok hewir (=riweuh)." Ceuk Teh Isah ka ncie bari nyureng.

"Iya itu my uncle, I am shoes chicken nya jangan satu atuh, tambah lagi yah one again." ceuk Teh Isah bari keukeuh gagayaan make basa inggris.

Si emang tukang baso ngan ukur bati nyengir we da puguh can ngarti. Sanajan bari can ngarti ge si emang terus we ngaladangan baso jeung ngabungbuan ku sarupaning uyah, pecin, penyedap, pedes, minyak bawang, goreng bawang katut saledri.

Sarerea geus mimiti saleuseurian nyeungseurikeun kalakuan Teh Isah nu keukeuh so so an make basa inggris siga nu heu'euh.

"Isah, naon atuh ari shoes chicken teh? Itu si emang na ge teu ngartieun" ceuk Ega mairan milu nanyakeun naon nu maksud ku Teh Isah menta ditambahan shoes chicken.

"Eueueuhhhh....ieu mah nya adik ku saruana jeung si emang. Cik sing ngarti atuh. Itu tuh shoes chicken teh." ceuk Teh Isah bari nunjukkeun kana 'ceker hayam' nu aya dina dalung godogan baso.

Kontan sererea geerrrrr saleuseurian tingbarakatak nempo kalakuan Teh Isah ngajak ngobrol tukang baso, pesen make gagayaan make basa inggris, teu nyangka teu kapikiran yen nu dimaksud 'Shoes Chicken' teh sihoreng simana horeng teh ceker hayam. Teuing nerjemahkeun tina kamus nu mana. Nu puguh mah sigana tina kamus Tatang Sutisna. Hahahha...

malahan nyebut ka tukang baso ge 'may angkel' cenah maksudna mah 'emang'. Heuhey deudeuh..... Isah.... Isah aya aya wae hirup teh didinya mah . Enya da hirup mah heuheuy jeung deudeuh.... edisi bahasa inggris rasa bandung cenah....

Cag!

#thu23032017

#ensitha