*Alai molo tung sogo rohamuna mangoloi JAHOWA,pillit hamu ma sadarion manang ise naeng oloanmuna,manang debata sileban angka nanioloan ni ompungmuna dibariba ni batang Aek,Manang debata ni halak Amori nampuna tano naniingananmunai, alai anggo au dohot donganku sajabu ikkon JAHOWA do oloannami.(Josua 24:15).

Pendahuluan / Patujolo.

Uju si Josua na mamimpin bangso Israel ruar sian tano misir, dung sarimatua ibana di ujung ni ngoluna,dijolo ni bangso Israel dipatuduhon/ dipapatar si Josua do sude pambahenan ni Jahowa na paluahon bangsoi sahat tu tano Kanaan.Tung tangkas do dipaingot tu nasida .ala tikki i bangso Israel olo Dope manomba debata sileban ,manang tu dolok natimbo dohot tu batang aek.

ISI

Dipapungu si Josua do bangso i,jala tung tangkas didok manang dihatindangkon anggo ibana iikon Debata do sisombaonna manang sioloanna. Nungga dibereng si Josua ngolu ni si Musa natongtong Satia jala mabiar maradoppon Debata huhut sae marhaporusan tu Jahowa.ima na tong gabe diihuthon jala ditiru si Josua.Holan Debata do namangalehon haluaon dohot hamonangan i.Alani i sae marsihohot do rohana tu Debata parasi roha na paluahon jala na sae mangalehon pangurupion i.

Asing ni i muse tangkas do tong dididok ibana dohot sude donganna sajabu ikkon tongtong marsomba tu JAHOWA.dang holan dirina.Dipataridahon si Josua do sada bukti tanggung jawab naikkon sude nasida biar maradoppon Debata.Sian i taida ma sada contoh binahen ni si Josua patuduhon haporseanna tu JAHOWA DEBATA.

Aha do inti ni Josua 24:15 ? Marhite turpuk on naeng botoonta ma.

* Ikkon hot jala togu do haporseanto tu Jahowa,jala ikon biar rohatta marnida Ibana manang aha pe namasa di parngoluonta.

*Sotung olo manimbil manang gabe marsomba tu Debata sileban manang angka gana- ganaan na adong diportibion.Ai dijamanta sonari on tung Godang do Akka Debata sileban na boi mangambati Hita ro marsomba Manang mamuji Tuhanta.manang Gabe olo marbalik rohanta Sian Tuhani.isarana: Arta portibi,gatget,jabatan dohot lan akka hinauli ni portibion.

*Ro ma Hita tu adopan ni Tuhan dibagasan unduk dohot serep ni roha tulus ma taulahahon jala taparangehon Akka na nihalomohon ni DEBATA. Angka dia ma i? Isarana martangiang,ringgas tu parmingguan manang tu partangiangan dohot tu Akka ulaon parhuriaon.

Kesimpulan/Panutup

Songon sada halak Kristen hita ikkon tapatarida ma tanggung jawabta di tonga ni keluarga ,songon sada orangtua:

1. Gabe Sada Ama namamboan sude anggota ni keluarga mamuji pasangaphon goar ni DEBATA.Mangajari huhut mangarahon Angka ianakonta asa holan porsea jala marhaposan tu Jahowa.Sahalak Ama na ikkon mambaen contoh Manang gabe sitiruon.

2. Songon sada Ina di tonga ni keluarga Gabe Ina sipartangiang,naserep marroha ,patoguhon haporseaon ni keluarga maradoppon Tuhan i. Contohna mangajari marrede,martangiang,pasahathon Hata ni Debata huhut mamodai akka ianakon,tarlumobi mai boi patuduhon pangalaho dohot pambahenan na uli nadenggan marhite Akka parsaoran.

Songon sada ruas Hita ditonga ni Huria naeng ma siparsidohot hita dibagasan angka panghobasion boi doi marhite tangiang ,gogo, tikki dohot pambahenan.

Attong naeng ma Hita dohot manghatindanghon jala maniiru si Josua namandok" Alai Anggo au dohot donganku sajabu ikkon Jahowa do Oloan nami".

Hata ni natua - tua mandok"

*Dalan tu sidikalang ,ikon boluson parbuluan

Tagogoma martangiang jala mangulahon hata ni Tuhan,

Asa tung dapot hangoluan.

* Mardalan motor sedan

Lewat tu pakan baru

Jolma na burju mar Tuhan

Ikkon do dapotan pasu- pasu.

*Tio mual di huta

Inumon ni angka pangula

Martua ma ama dohot ina

Na marsomba tu Debata Jahowa

Amen Tuhan ta ma masu masu Hita sude.

Tangerang,14 Maret 2023

Cst Mondang Sianturi.