Gaya Ndak Nio Kironyo Manggilo

Oleh Uki Lestari

Indak disangko, kironyo kini alah sapakan se liburan bajalan. Jadi, hanyo sapakan lai tingga untuak basanang-sanang di rumah. Mudah-mudahan awal 2021 bisuak lah mulai tatap muko jo anak baraja di sekolah lai. Aamiin.

Manuruik urang saisuak, istilahnyo malam Minggu kalabu. Aa, iyo basuo dek ambo kini. Malam kini iyo malam Minggu kalabu dek ambo. Kalabu bana ko a. Maarah ka galok, kalam.

Dari sore, alah maajak apak paja nak pai main sore jo anak-anak gai. Paliangndak nan dakek-dakek se. Ka Damar Resto contohnyo. Kironyo, ndak jadi. Maleh kalua.

Lah saminggu mambanam se di rumah dek kesibukan yang paralu diparatian khusus. Nak mancaliak oto banyak la kalua. Atau nak marasoan angin sepoi-sepoi la di tangah jalan. Tu takambang-kambang rok deknyo kan. Balari-lari mode urang India tu. Hahay. Indaklah! Jan jauah bana pangana sanak lai. Beko bacuboanlah. Hahaha.

Tapi, walaupun malam Minggu kini ambo ndak pai kama-kama dek maleh manggarik tadi, kironyo di rumah ado samba lamak yok, sanak. Samba lado masiak bacampua bada.

Sabananyo ambo indak nio bana samba itu do. Yo bukannyo indak basyukur. Tapi, pangana ambo tadi nak makan mi padeh ko a. Lah titiak salero ambo nak makan mi jo lado kutu. Tapi, dek mancaliak kulek uda ambo makan, nak ambo cubo lo gak salayok manguleknyo. Eeeeh, kironyo ketagihan ambo deknyo. Lamaaaaak!

Rencana ambo, indak nak makan do. Ka buek mi goreng se rencana kan. Kironyo mi goreng padeh lewaaaat dek iko. Yo asiang lo badanceh-danceh rasonyo. Kok lalu mintuo ambo waktu ambo makan tu a, lai nampak juo dek ambonyo. Hihihi.

Tu apo lo istimewanyo tu. Kok lai nampak juo mintuo lalu! Kok nan lamak ko istilahnyo ndak nampak mintuo lalu lai do kan. Hahaha.

Dek ambo minantu yang berbakti tadi juo nah. Indak tapadian dek ambo, kalau mintuo ambo lalu tu indak ambo sapo do. Hehehe. Tatek juo ambo saponyo. Hihi.

Ditambah pulo, nan samba lado masiak tu mintuo ambo nan mambuek, sanak. Baa indak ka manyapo liau. Hahahha. Baliau pecat ambo jadi minantu beko. Iyo indak terkaha dek ambo do.

Baa ka baa, payah juo mancari mintuo saelok itu mah. Anak bujangnyo elok pulo. Payah mancari di zaman milenial mode kini ko mah. Tu makonyo, basyukur juo lah ambo. Sapo juolah. Batarimo kasih juolah. Hihi.

Lah tu mah bahas lado masiak tu. Kok rasonyo, iyo lamak bana dek ambo tadi. Biasonyo ambo indak batambuah makan do, kok tadi iyo khilaf ambo. Batambuah ambo sanak! Bara kilo lo kolah bisuak batambah ka suok timbangan tu. Antahlah e. Ndak ambo pikian bana do.

Lah lewat isya, nan uda ambo ko ado-ado se pangananyo. Nak mambuek teh talua lo baliau. Ambo tau, teh talua buatan uda ambo ko yo maut rasonyo. Yo kalah urang manggaleh ko dek nyo a.

Padahal dulu paralu sanak tau, ambo indak nio stek alah juo teh talua ko do. Yo gali-gali lidah ambo ko minum teh talua tu. Sampai kalua nyo liak dek maloyo paruik ko. Eh suatu waktu, tajadilah peristiwa naas tu.

Ambo baru siap malaian. Berbagai minuman panguek stamina ko nyo buekan lah dek uda ambo. Tamasuak teh talua ko. Basamangek lah uda ambo mambuekan. Lah ambo banaan, ambo ndak nio teh talua tu do, tu galak se uda ambo. "Cubolah buatan Uda beko lu," kecek liau.

Kironyo mah sanak, iyo ambo baranian mancubonyo. Demi kau dan si buah hati lo cariyonyo ko a. Ambo cubo saujuang sendok lu.

"Ondeh! Baa kok mode ko rasonyo ko? Baa kok mode raso dalgona bak kecek urang-urang tu eh," batin ambo.

Ambo cubo suok kaduo, katigo, kaampek, sampai kariang galeh tu dek ambo. Hahahaha.

"Ba a?" tanyo uda ambo.

"Lamak!" jawab ambo. 

"Tambah sagaleh lai," mintak ambo. Hahahahaa.

Sajak itulah sampai kini, kok teh talua uda ambo tu yo ndak bisa ambo do. Ndak bisa manulak. Hihihi.

Yolah sanak. Lah malam hari. Ko efek teh talua tu bantuaknyo lah bereaksi a. Hari hujan pulo. Aa, jan nan lain-lain lo pangana sanak tu. Maksud ambo, yo lamak raso badan kalau lah minum teh talua ko. Segar badan deknyo. Lamak lalok deknyo mah.

Okelah, lalok kito lai. Jan lupo ambiak wudu jo badoa sabalum lalok yo, sanak. Assalamualaiakum.

Muaro Paneh, 26 Desember 2020