CINTO TAHALANG DEK SITINJAU LAWIK

Oleh Uki Lestari

Ambo lupo, sajak bilo kisah kami ko bamulo. Sejarah nan ka indak habih ambo kana. Ambo sorang se heran, apo lai urang lain.

Ikatan kami baduo ko yo lah ndak main-main lai do. Lah bagaikan pinang dibalah duolah. Bantuak setangkai bungo cik ayam iyo lo bantuaknyo mah.

Lai tau sanak jo bungo cik ayam? Aaa, iyo itu. Ado tangkai, bungo, kalopaknyo gai nak. Aa, kami mode tu lo.  Ambo tangkainyo, nan surang lai daunnyo.

"Tu sia jadi bungonyo, Ki?" tanyo sanak heran mah nak. Kok lai namuah sanak jadi bungonyo, jadilah. Ambo ndak nio do, bantuaknyo rancak tapi baunnyo busuak. Haha.

Yesi Arisanti namonyo. Tapi kami maimbaunyo bu editor kalau sadang bagarah, ni Yesi kalau sadang indak bagarah, dan uni se kalau sadang tagageh.

Baliau ko calon editor yang disabuik-sabuik dek guru kami, Pemred MG untuk masuak ka meja editor MediaGuru. Uni Yesi jo Bu Mul ko duo serigala mah. Eh salah, duo calon editor maksud ambo.

Tapi, waktu pastinyo alum tau lai. MG sadang malatiah editor yang baru ditunjuak juo lu. Nan paralu, uni wak ko basaba se lu. Nan jatah marato.

Ambo tau mah, kini baliau naiak insang, ambo mangecek mode iko. Karano, inyo indak la nio bana jadi editor do, tapi manunggu mungkin iyo. Haroknyo lai saketek pulonyo, indak saba nyo nan banyak. Hahaha. Ampun, Uni!

Mangecek tantang uni nan surang ko. Bana nan ambo sabuik ko mah. Uni ambo nan surang ko urangnyo santiang jo elok. 

Kok lah kalua samangek 45 nyo tu a, saraso inyo se surang di dunia ko mah. Tapi nan ambo heran, samangek 45 se taruih, kurang se ciek manjadi samangek 44 ndak namuahnyo do. Haha.

Di _sosmed_, kami bantuak anak kamba. Apo-apo nan kami sabuik manyambuang se taruih.

Kalau di grup WA, kami se nan acok eboh baduo. Bantuak kami se nan punyo grup tu. Raso kami se isi grup tu baduo. Hihi.

Tapi sanak tau ndak. Kalau kami, Uki jo Yesi ko, alum pernah batamu sakali alah juo lai do. Pernah basuo, tapi indak saliang kenal waktu tu do. Bayanganlah dek sanak tu a,  ndak lawak la kami tu.

Sadang di dunia maya se lah eboh, apo lai kalau basuo di dunia nyato. Ka mode aa lah bisuak tu.

Tapi, bilolah ka basuo tu yo? Hanyo Tuhan nan tau. Mudah-mudahan basuo juo lah gak tigo kali, indak bana gak sapuluah kali. Hihi.

Tapi kalau manuruik umua, padahal ambo jo Ni Yesi ko lumayan jauah juolah jaraknyo. Uni ambo nan paling gadang se ketek juo dari balau lai mah. Tapi, antah dek apo kolah, kami maraso dakek. Malah dakek bana. Raso samo gadang.

Tapi indak badannyo yang samo gadang do yo. Tapi umua. Kok badan jan disabuik lai. Nangih ambo mancaritoannyo beko mah.

"Baa kok manangih pulo, Ki?" pasti itu tanyo sanak dalam hati mah nak?

Baa ka indak dek sanak tu. Ni Yesi tu tonjang urang e, ramping iyo pulo, pokok e kebalikan dari ambo nan barisi, padek, jo pendek ko lah.

"Barisi?" galak sanak yo. Atas pembelaan diri ambo ko?

Iyo mah, ambo manggadangan hati ambo se surang. Hihi. "Uki, iko indak barisi lai namonyo ko lai do, tapi lah panuah bana isinyo ko mah," pangana sanak, nak? Haha. Jadih-jadih. Bana tu mah.

Yo, pokoknyo kok soal badan, batulak balakang lah antaro kami baduo ko. Tapi sanak, biapun jasmani kami jauah bedanyo, sampai baserak-serak. Namun hati kami satu. Hahay yeh! Hahaha.

Manelepon acok juo kami mah. Kok manelepon tu a, ndak ado kalau ndak galak isinyo tu do. Pasti ado se nan bagalakan. Kok _chatting_ a, ado se nan babahas. Ado se nan ka disabuik. Kok ka maukua Indaruang ka Solok lah jo meteran. Atau maukua sesuatu nan ndak ado barangnyo di siko lah. Hahaha. Ado-ado se lah pokoknyo.

Tapi sajauah ko ambo kenal jo balau, ambo yo nak nio juo batamu gak sakali. Biapun cinto kito tahalang dek Sitinjau Lawik, mudah-mudahan ado masonyo nanti kito basuo.

"Tapi, ingek yo Ni, ado kopi nan mananti. Indak bana gak sa galeh, gak satangah panci jadi juo lah dih, Ni." Tu pasan ambo nah.

Salam rindu dari adiak uni di Solok. Adiak maya. Bukan adiak Maya lah. Uni ngarati mah maksud adiak Uni ko. Haha. Muah lah ciek dulu a.

Solok, 1 Maret 2020