Tantangan Hari ke -75

#TantanganGurusiana

Oleh: Ulfa Wahyuni, S.Pd.I.

             Kini alah hari ka tujuah anak sakola baraja daring. Nan daring ko aratinyo dalam jariangan internet. Baraja daring ko harus dikarajoan dek anak sakola untuk mangarahkan anak sakola ko ka kagiatan nan elok. Kok indak dibaok baraja beko malala ka malala se karajonyo.

Babagai macam tingkah anak sakola ko katiko baraja daring. Ado nan sangaik rajin, alun tibo jadwal pelajaran awak lai, lah ditanyo nyo tugas. Ado pulo nan satangah rajin, bapanggia – panggia jo WA jo talepon baru dibueknyo tugas ko. Ado pulo anak sakola ko nan ganjia, keceknyo indak ba paket internet tapi WA awak dibalehnyo juo. Tapi mujua juo dibalehnyo WA, kok indak tu baturuik ka rumahnyo lai.

Guru maagiah tugas di rumah tantu indak pulo ma aniayo. Tugas nan dibarikan guru sasuai jo jam palajaran. Indak pulo mungkin guru ma agiah tugas sagarabak buruak nan ndak ka ta tundo dek anak sakola. Kalau ado guru nan ma agiah tugas ka anak sakola sagarabak buruak, suruah inyo sato manundo garabak tu, lai ka talok.

Oi buyuang jo upiak usah lah malala juo. Tolong lah buek tugas ko nak e. Libur nan di agiah pamarentah ko bukan untuak malala, tapi untuk manjago kasehatan rakyat indonesia. Kok indak juo dibuek tugas ko nak, beko sakola ibuk jenjeng talingo tu. Eh salah, kok indak juo dibuek tugas ko nak beko ndak santiang awak.

#edisibahasadaerah

Tanjung Emas, 29 Maret 2020