#TantanganGurusiana 

Abi Pai Mamanciang

Tantangan gurusiana hari ke 18

Hari minggu pagi, cuaca rancak. Abi baru jago lalok langsuang pai kalua. Nampak abak sadang manyiapkan peralatan mamanciang. Abi batanyo ka abak, kapai kama abak. Dijawek samo abak, kalau abak kapai mamanciang ka danau. Buliah Abi pai Bak, kecek Abi. Abak maangguak an kapalonyo dan senyum ka Abi.

Indak lamo tadanga suaro amak basorak dari dalam, kalau nasi goreang lah masak dan bisa dimakan. Abak maajak Abi sarapan pagi, bia sudah tu siap- siap untuak pai mamanciang ka danau.

Siap makan Abi langsuang mandi dan indak lupo mamakai topi bia indak angek beko pas mamanciang. Amak pun nampak lah manyiapkan minuman dan makanan yang kadibaok abak samo Abi ka danau.

Abak samo Abi barangkek ka danau bajalan kaki. Dek rumah Abi indak jauah bana dari danau. Sampai di danau abak maajak Abi naiak biduak untuk manuju ka karamba. Dek abak mamanciang dakek karamba adiak abak. Adiak abak biaso Abi mamanggia pak etek Riko. 

Sampai di karamba pak etek Riko, biduak dikabek an abak ka karamba. Abak samo Abi naiak kateh karamba. Dan abak langsuang mancari tampek yang nyaman untuak mamanciang.

Kironyo pak etek Riko sadang maagiah makan lauak di karamba. Sanang hati Abi mancaliak lauak- lauak maloncek- loncek diagiah makan. Abi pun dibuliahan pak etek untuk ikuik maagiah makan lauak di karamba.

Siap manolong pak etek, Abi duduak disampiang abak. Abi bacarito samo abak, kalau lah gadang nyo nio punyo karamba bantuak punyo pak etek Riko. Rajin baraja yo nak kecek abak, bisuak lah gadang mudah- mudahan banyak lo karamba anak abak.

Bersambung...