Minum Kawa

Oleh: Zakiah, SS

"Ooi, mak niaklah nungkawa!"

Tadonga ughang maoghiak daghi dangau atau sadang duduk di pamatang sawah.

"Yo, yuang, toruhlah!" jawek ughang nan lalu.

"Nak, buek nungkawa beko muah, antaan ka sawah, ughang manyabik di sawah awak kini!"

"Jadih Mak!" kecek supiak Banun ka amaknyo.

Sisuak kato-kato nungkawa tu biaso dek kami untuk manyobukan sagalo macam makanan selingan selain nasi. Biasonyo toruh ado kalau ado ughang nan awak bao untuak kabakarojo. Ado nan bakarojo ka sawah, ka poghak atau karojo batukang di ghumah.Ado nungkawa nan ghingan ado juo nan satangah boghek atau bakuwah. Ado nungkawa tu goreang pisang atau goreng ubi, ado juo kolak pisang jo sakunik. Bubua kacang padi atau bubua puluk itam tamasuak nungkawa juo namonyo.

Niniak dulu lai bacarito baso kotu sisuak ado namonyo daun kawa. Daun kawa itu soman jo daun kopi nan dikonghiangan. Sudah tu dilotakkan di ateh salayan, diasoki namonyo. Kalau lah koghiang sudah tu diobuh sampai mandidih, jadilah aianyo untuk minum panggonti te atau kopi. Aromanyo lai oghun pulo soman jo jo kopi, tapi mancoliah rono aianyo saghoman jo te.

Jadi kironyo kato nungkawa tu asanyo daghi kato minum kawa, tapi kudian baghubah sajo jadi nungkawa. Satiok ughang makan atau minum selingan disobuk sajo jadi minum kawa atau nungkawa.

Kironyo sisuak katiko zaman panjajahan Balando, kopi tamasuak tanaman nan barogo bona, rogonyo maha, sainggo ughang awak disughuah batanam kopi. Tapi awak indak buliah manikmati kopi ko doh, gak ciek incek pun ndah buliah tingga. Jadi ughang awak indak buliah minum kopi sobab kopi tu baagiahan ka panjajah sadonyo, untuak awak ughang pribumi taposo daun kopi tu sajo nan bajadian untuak panggonti te atau kopi. Jadi daun kawa ko cubo cubo sajo sisuak gak nyo nyoh, dek kopi ndak ado leh, lah abih baagiahan ka panjajah. Yo malang pulo awak sisuak yo, kejam bona penjajah ko, awak nan mananam, di tanah awak batanam, tapi hasianyo dibaonyo ka negara inyo. Ndee, yo sakik ati awak dek inyo.Tapi ado pulo hikmahnya, kreatif ughang awak sainggo obeh maso lai lomak pulo daun kawa ko.

Salain ghasonyo lomak, kironyo lah diteliti dek ughang banyak khasiat daun kawa ko kironyo.Kawa daun dapek jadi ubek dek ughang nan batekanan daghah tinggih, sakik gulo atau diabetes, juo untuak panyakik jantuang. Kawa daun dapek pulo malancarkan saluran pernapasan.

Kini ughang lah bosan pulo jo sagalo nan babau modern. Ughang lah mulai taghagak jo mangona maso sisuak. Sampai ka makananpun ughang mulai baliak mambuek makanan maso sisuak.

Ikolah kironyo minum kawa tu. Minuman daghi daun kawa nan disajikan pulo jo sayak tampughuang. Di bawahnyo dialeh jo ponghiang nan dikongek sainggo ghancak pulo untuak manenggekan sayak tampughuang tompek minuman kawa cako. Sero pulo kosannyo, he he, unik bak kecek ughang kini.

Minum kawa ko lomak pulo ditambah jo goreang pisang, goreang ubi, bakwan, atau sukun. Minum kawa ko paliang lomak dan laku di daerah dingin soman Bukittinggi, Padang Panjang jo Batusangka. Di Payokumbuah lai ado pulo, lomak di minum katiko aghi dingin.

Kok ado kanti nan penasaran jo minum kawa buliah datang ka Sumbar. Lah banyak kini kodai tompek ughang manjuanyo di sapanjang jalan lintas Sumbar.

Payakumbuh, 16 Oktober 2022