Oleh. Alina Said, S. Pd.

Sajak paneh manintiang ka patangko. Banyak urang nan sakiek kapalo. Dea sakiek kapalonyo yo, karano dek paneh garang bana hari-hari bulakang ko, sampai rasonyo taraso ka banak. Sahinggo katiko hujan tibo rasonyo mandangak-dangak jiko kapalo kanai hujan. Ditambah pulo panehnyo tu tibo dikuliek sangaik padiah pulo rasonyo.

***

Jadi dek paneh nan garang tu, baitu pulo lah nan taraso dek Upiak Rabiatun namonyo. Taraso pulo sakiek kapalo keceknyo Sakiek kapalo tu taraso dek Upiak Rabiatun katiko pulang dari sakolah. Siap babalanjo dari pasa untuak kaperluan dapue. Di jalan mandadak kato Upiak Rabiatun tibo-tibo je hujan hari. Niak hati Upiak Rabiatun ingin mambarantian hondanyo, tapi dek ado pulo yang manyasak,-nyasak di rumah, tapaso honda dijalanan taruih dek Upiak Rabiatun untuak bisa sampai capek tibo di rumah.

***

Tibo di rumah Upiak Rabiatun langsuang mamasak. Sorenyo siap mandi mandangak-dangak taraso kapalo Upiak Rabiatun . Lalu Upiak Rabiatun balilah ubek paramex. Tapi indak juo cegak. Dicubo dek Upiak Rabiatun baok lalok, sakieknyo indak jo hilang sahinggo kaniang Upiak Rabiatun manciringik je taruih. Mancaliak tingkah Upiak mode tu jadi heranlah Udanyo akhirnyo batanyolah Uda Upiak Rabiatun ka istrinyo tercinta.

"Dek a Upiak sakiek kapalo?" Kecek Uda Upiak Rabiatun lo.

"Kanai hujan tadi Da," Jawek Upiak Rabiatun sambie mancaringik je taruih maawai kaniangnyo.

" Oo.. Lah makan ubek Paramex, "Sambuang Uda Upiak Rabiatun baliak.

".Alah Da, tapi indak juo hilang doh, " Tukaih Upiak Rabiatun sadiang manakan-nakan kaniangnyo jo talunjuak, marasoan dayuik di kapalo.

"Baoklah mandi, basahan kapalo tu !" Kato Uda Upiak Rabiatun baliak.

" Oh, Io pulo yo Da, ba a ndak tadi Uda sabuik lah makan ubek paramek pulo upiak," Jawek Upiak Rabiatun kek Udanyo. Ondeh.. mandanga mandi tu Upiak Rabiatun lari capek ka kamar mandi. Uda Upiak Rabiatun mancaliak lah mangeleang-geleang je kapalonyo dek mancaliak Upiak lari ka kamar mandi. Dari bulakang dicaliak rambuik Upiak Rabiatun lah bantuak kanai sentrom listriik.

***

Setelah itu kalualah dari kamar mandi Upiak Rabiatun sadiang senyum - senyum se, sambie mangecek kek Udanyo.

" Io mujarab ubek dari Uda yo, hilang sakiek kapalo Upiak langsuang deknyo. Kapalo Upiak tadi barek bana Da, badayuik - dayuik, kinilah taraso ringan je rasonyo," Kecek Upiak Rabiatun galak.

" Makonyo lain kali kalau musim paneh, tibo-tibo hari hujan, kapalo jan sampai kanai hujan. Kalau kanai hujan pasti kapalo sakiek, apapun ubeknyo ndak katalok bagai jo ubek doh. Ubek yang mujarab tu adolah mandi, basahan kapalo baliak, jan sampai ditunggu sampai bisuak, " Ciloteh Uda Upiak Rabiatun sambie mausap-usap kapalo Upiak Rabiatun.

"Hebat Uda yo, tarimakasih ilmunyo yo Da" Cando Upiak Rabiatun ka Udanyo sambie manyanda an badannyo duduak di sofa.

-----------------------------------------------

Tantangan menulis hari Ke_34

Gurusianer menulis hari Ke_224

MGI