Hari minggu hari libur, sadoe pasti tau. Apolai anak-anak, sanang bana mandanga hari minggu. Tantu dalam pikirannyo pai kalau dari umah, malala, makan-makan. Nan paliang disuko e tu lapeh dari karajo dan tugaih-tugaih sikola.

Tapi tabaliak jo amak e. Hari minggu tu ndak sangenek karajo doh. Lah tatumpuak, mulai dari biliak muko, biliak balakang, ruang tangah, apolai dapua. Saungguak kain nan kadisasah.  Sagunuang lo kain nan kadigosoak. Samba nan kadimasak alun jalaih. Paniang.  Sabana taseso amak hari minggu ko. Ndak dapek maluruihan pinggang agak sakijok mato. 

Tapi amak-amak ko memang santiang. Segeh kecek urang. Tu mangkonyo diamanahi jadi "amak-amak". Dek mamikian anak kasanang, bialah wee jago paliang dulu, lalok paliang balakang. Mode tu bana sayang amak ka anak, apolai lai ka apak e. Eeh ...

Nan jadi masalah tun, indak karajo banyak doh. Sagelang dek amak tu nyoh. Tapi, pitih amak tu bana nan alah abih. Paniang amak mamikian bulan nan sayuik ko. Dijalaihan ka anak-anak, ndak mangarati juo. Ayoooik yeah. Baa aka amak lai ko?

Jadi, bapikia kareh lah amak hari ko. Pado mintak kalua wee, Amak ajak bakameh-kameh. Mancuci onda, manyiram bungo, mambarasiahan taman. Ujuang-ujuangnyo mandi jo aia selang di muko umah. Ndak disangko kiroe hari lah mugarik. Ndk mungkin kalua lai. Lupo wee jo malala. Tapi hatinyo sanang, lah dapek hiburan kecek e. Amak sanang pulo, umah barasiah, pitih ndak kalua. Hahaha.

Pekanbaru, 28 Februari 2021

#Tagur_hari_228