ADO MASONYO

Oleh : Ade Putra

Ndak sangajo, ambo mancaliak foto iko diberanda facebook kawan, tu ambo simpan. Kayaknyo bisa untuak ide manulih. Foto saikua ayam, mamatuak badan alang. Kok bisa ayam mamatuak alang, biasonyo alang ko yang mamatuak ayam. Ambo bapikia, kiro nyo banyak palajaran iduik nan bisa kito ambiak dari siko.

Ado masonyo, sayok alang nan kuek, lincah untuak tabang kian kamari tu, patah ndak bisa digunoan lai. Sahinggo alah tabujua se di ateh tanah. Baitu juo jo diri kito, badan nan kuek, gagah, dan rancak pasti ado masonyo untuak manjadi lamah ndak badayo.

Ado masonyo, kuku jo jari alang nan tajam guno untuak manangkok ayam, ula jo binantang lain nan jadi makanannyo, ndak bisa digunoan lai. Baitu juo jo diri kito, ado masonyo kalau kito ndak bisa mambanggaan kakuasaan yang ado pado diri.

Ado masonyo, muncuang alang nan tajam untuak mancabiak - cabiak badan lawannyo, ndak bisa nyo gunoan lai. Baitu juo jo diri kito, ado masonyo muluik kito nan biaso lancang ka urang, muluik nan biaso manyakik an hati urang lain, kini ndak bisa digunoan, ndak bisa muluik ko mangecek lai.

Itulah iduik kito nan sabanannyo, ibaraik alang yang tasabuik binantang nan bakuaso, binatang nan kuek, ado masonyo alang manjadi lamah. Kakuasaan inyo salamo ko ndak baguno lai, dek gara - gara sayok patah, atau kaki patah, badan lamah dan lainnyo. Baitu juo jo diri kito, biaso kito maraso punyo kuaso, punyo kuku nan kuek, akan ado masonyo kuaso kito tu ndak bisa dipagunoan.

Jadi, ndak ado yang bisa kito banggan di dunia ko do, sakuek apopun, satinggi apopun jabatan kito, masih ado Allah nan labiah tinggi dari kito.

Wassalam.

Dharmasraya, 21 Juni 2020