CARITO HARI AKAIK

Oleh : Ade Putra

Sangajo kami agak pagi pai ka pasa Sungai Rumbai, sakalian ma isi bensin untuak garobak tuo kami ko. Soalnyo, bensin agak payah di SPBU, jadi kalau pai siang, jan harok lo ka dapek ma isi bensin lai.

Untuak pai ka Sungai Rumbai, garobak kami akan malalui tigo SPBU. Kami barangkek jam 7 lewek saketek. Sampai di SPBU partamo, nan bensin ndak ado lai. Kami taruih jalan, dan singgah di SPBU kaduo, samo lo, ndak lo ado bensin. Kami taruih, baranti lah kami di SPBU katigo, disitu kami caliak alah panjang urang ma antri. Ambo pun ikuik ma antri.

Hampia sa jam ma antri, petugas SPBU baru mulai buka. Namo antri, tantu yo harus ado aturannyo. Ndak buliah manyarobot nak duluan. Di balakang kami, tadangalah urang heboh, gara - gara dek masalah antri tadi. Apak ko nak manyorobot duluan se, sadangkan urang alah lamo ma antri, parang muluik lah nyo.

Nan labiah padiah e, pas giliran garobak kami, alah babukak tabuang minyak garobak tu, tibo - tibo petugas e manyabuik, minyak lah abis. Ondeeh...mandeh...yo sabana kesal awak dek nyo. Akhianyo, ambo baliak ka SPBU kaduo, ba isi garobak jo pertalite lai.

Sudah maisi tu, kami taruih ka pasa, dek bahan samba lah mulai abih, ambo request ka urang rumah untuak bali cindawan kukuan. Hmm..lamak kalau digulai. Satekong limo ribu dunsanak. Lumayan maha. Baa dunsanak, apo ado yang suko jo cindawan kukuan ko?

Alhamdulillah, hari ko lai masih diberi nikmat dek Allah. Semoga kito ndak lupo ba syukur jo apo nan kito dapek kini ko.

#Manulih hari ka 194

Dharmasraya, 26 Juli 2020