LUPO - LUPO MAINGEK AN

Oleh : Ade Putra

Kecek urang tuo - tuo kito dulu, " pasa jalan yo dek acok baturuik, lanca kaji yo dek acok baulang ". Lupo - lupo maingek an kapado kito sadonyo dunsanak, apolai kito nan jadi guru.

Dulu lai ado juo palajaran muatan lokal di sikolah. Misal e Budaya Alam Minang Kabau ( BAM ). Kini palajaran itu lah ndak ado.

Mancaliak banyak bana anak - anak sikolah jauh dari karakter nan elok, kito sabagai guru yo acok - acok maagiahan ilmu nan indak ado pado buku palajaran. Baa caro nyo mangecek ka urang gadang, ka sasamo inyo, ka nan ketek atau nan ka nyo sagani.

Mungkin kito indak ka lupo jo jalan nan ampek, jalan nan salalu kito pedomani dalam iduik sahari - hari.

Partamo, Jalan Mandaki.

Jalan mandaki mukasuik e, tingkah laku urang ketek kapado urang nan tuo atau di tuo an, baik malalui parbuatan atau tingkah laku malalui bahaso. Sasuai jo pantun adaik " kalau indak tau jo Bukittingi, indak tau pulo jo malalak, kalau indak tau jalan mandaki, indak tau angok nan ka sasak "

Kaduo, Jalan Manurun.

Jalan manurun mukasuik e, tingkah laku jo sopan santun dari urang tuo atau yang dituo an kapado nan labiah mudo, baiak dari sikap jo tingkah laku maupun malalui santun budi bahaso. Sasuai bunyi pantun adaik, " kok nak tau di ujuang gurun, cubo bajalan di tapi banda. Kok indak tau jalan manurun, alamaik badan masuak lurah".

Katigo, Jalan Mandata.

Jalan mandata mukasuik e, tingkah laku jo sopan santun bagi urang nan samo gadang jo status sosial baiak malalui sikap jo tingkah laku maupun malalui santun budi bahasao, sasuai bunyi pantun adaik, " kok pai kito ka sawah, jan lupo mambaok pinggan. Kok lupo bajalan di nan data, indak tau arah tujuan".

Kaampek, Jalan Malereng.

Jalan malereng mukasuik e, tingkah laku jo sopan santun nan paliang tinggi dalam situasi jo keadaan tatantu malalui kato kias, pepatah, petitih, mamang, bidal, dan pantun atau manyampaian sasuatu kapado urang malalui pihak lain. Sasuai bunyi pantun adaik, ' pai manggaleh ka kampuang teleng, mambao udang jo pansi sawah. Kok indak pandai jalan melereng, raso ilang budi tanjua ".

Mari dunsanak, kito ajaan jalan nan ampek ko ka anak didik di sikolah, atau ka anak kito di rumah. Bia anak anak kito tau jo etika.

#Manulih hari ka 187

#ManujuDiamon

Sumber : Sayuti,M.Dt.Rajo Penghulu.2008. Tau jo nan ampek. Padang : Mega Sari Kerjasama Sako Batuah.

Dharmasraya, 19 Juli 2020