NDAK AMUAH LALOK SIANG

( Menulis hari ke - 166 )

Oleh : Ade Putra

Lah bara hari ko, anak bujang ambo ndak namuah lalok siang. Pangana e nak main sajo. Padahal lah dari pagi nyo main. Sudah mandi pagi,ntuak manganak an baju se payah, alah bakarenjangan nyo nak pai main. Sahinggo ndak amuah nyo makan pagi. Tampek main yo lai ndak jauh bana do, masih bisa dicaliak an kalau inyo sadang bamain. Cuma yang namonyo anak - anak, pangana e main ka main sajo.

Pernah sakali, pas ambo alah pulang karajo, dan mamanyo alah pulang juo, kami masuak rumah manyuruah inyo lalok siang. Pintu muko kami ambek jo honda, bia ndak kaburnyo kalua. Kalau ndak diambek, nyo bisa mambukak pintu muko tu.awalnyo, lai ikuik lalok juo inyo jo kami, dan kami icak - icak lalok. Ndak sampai limo minik, nyo lah beraksi, pai ka jendela mancaliak situasi di lua, apo ado urang main. Sakali- sakali tadanga nyo pai ka pintu muko.

Namonyo latiah pulang karajo, kalau lah dibaok bagolek, mato ko yo ndak amuah diajak kompromi do, alah takalok se sabanta. Tibo - tibo ambo tasintak, soalnyo alah aniang se, ndak tadanga si buyuang ko malasak dalam rumah lai. Ambo mancigok kok lai laloknyo dakek ama e, kironyo indak. Tu ambo caliak kalua, kiro e nyo alah pai main. Tapikia dek ambo, dima lah si buyuang bisa kalua, soalnyo pintu muko diambek jo honda. Eee....kiro e nyo kabur dari pintu balakang, jo pintua dapua.

Dharmasraya, 28 Juni 2020