Ndak Bisa Pulang Kampuang 1.

( Menulis hari ke - 103 )

#TantanganGurusiana

Pagi - pagi bana si Rahmat alah mambukak kadai fotocopy nyo, nyo sapu lah kadai tu dari dalam sampai kalua, nyo rapian buku - buku, pena, jo karateh nan alah baserak. Di iduik an nyo mesin fotocopy, bia capek beko kalau ado urang fotocopy, sambia nyo iduik an lagu - lagu minang.

Rahmat alah hampia sabaleh tahun marantau ka Bandar Lampung, dikecek an sukses yo ndak juo, tapi alhamdulillah lai ado peningkatan dari tahun ka tahun. Kini nyo alah bukak cabang lo ciek lai, ndak jauah dari tampek fotocopy nan lamo. Salain itu, Rahmat lai acok juo mambantu amak, apak ( katiko masih iduik), uni, uda, adiak - adiak sarato kamanakannyo dikampuang.

Alah labiah sabulan ko, urang pai fotocopy langang, duo karyawan nyo di kadai yang ciek lai, lah nyo suruah pulang kampuang jauah - jauah hari, beko takuik ndak ado oto manambang pulang. Biaso lai dapek anam ratuih ribu sahari, kini tigo puluah ribu sajo ndak nyampai lai.

Wabah virus corona nan alah manyebar luas di banyak tampek, mambuek urang - urang banyak badiam diri di rumah. Anak sikolah diliburkan, dituka jo baraja online di rumah. Sahinggo, ndak ado urang pai fotocopy, ataupun ma print tugas ka kadai Rahmat.

Panjang manuang Rahmat pagi tu, alah pukua duo baleh siang, alun juo urang pai fotocopy ka kadai inyo. Tapi nyo batekad akan bukak kadai ko sampai malam, mano tau beko ado urang fotocopy, satidaknyo dapek ntuak makan anak bini hari tu.

Sewa kontrakan, bali karateh, bayia listrik, pariuak dapua bini, balanjo anak, apolai urang ka rayo pulo, itu nan taruih tapikia dek Rahmat.

Rencananyo, tahun kini nyo nio baliak kampuang, taragak pulo jo kuburan apaknyo, taragak jo samba amak, ngumpua jo keluarga, bisa babuko basamo, tapi Rahmat hanyo bisa mauruik dado.

Bersambung....

#RamadahanKetiga

Teluk Lancang Tebo Jambi, 26 April 2020