Ndak Bisa Pulkam Bagian 4

Oleh : Ade Putra

Saminggu lai urang ka rayo. Taragak pulang kampuang tapaso ditahan. Alah tabayang gulai toco samo samba jariang amak di kampuang. Tapi dek musibah corona ko, lah amba se hati rahmaik.

Samakin banyak karuik kaniang Rahmaik. Baju rayo anak jo bini alun juo tabali. Untuang dari manjua samba ndak lo sabara do. Kama lah cari aka lai.

Lah baharok - harok dapek bantuan dari pamarintah, sampai kini alun juo sampai ditangan. Mungkin yo ndak razaki untuak mandapek bantuan.

" Pa, bilo kito pai bali baju rayo pa? Naira nio baju gamis nan mode di tipi tu pa a ". Kecek Naira ka papa nyo.

" Saba yo nak, kalau ado piti bisuak kito bali " jawek Rahmaik sambia mancaliak anaknyo.

" Bilo papa ado piti tu pa, ndak saba Naira nak pai kapasa ntuak bali baju pa "

" Doa an lah papa yo nak, bia bisa dapek piti banyak, dan bali baju untuak Naira "

" siaaap papa., semoga papa dapek piti banyak. Semoga jualan papa jo mama laris. Aamiin " kecek Naira, sambia baranjak dari papa nyo.

****

Rahmaik jo urang rumah sibuk mambungkuih samba jo kolak untuk ka dijua dakek kadai fotocopynyo. Baharok galeh nan dibuek kini abih, jadi lai ado piti untuk pambali baju rayo Naira.

Di pikiran Rahmaik hanyo wabah covid - 19 ko capek hilang. Jadi nyo bisa buka kadai baliak, bausaho baliak, soalnyo kebutuhan samakin banyak juo. Ko Naira nak masuak sikola lo, tantu banyak mamakan biaya. Pemasukan salamo ko yo samato dari hasil fotocopy tu nyo.

Basambuang.......

Teluk Lancang Tebo Jambi, 17 Mei 2020