Si Ujang ( Tantangan menulis hari ke - 40 )

#TantanganGurusiana

Si Ujang, alah lamo indak baliak kampuang. Maklum nyo kini sadang sibuak kuliah. Jadi karajo sahari - sahari nyo, yo kuliah dan kuliah.

" Assalamualaikum. Mak!, baa kaba amak, lai sehaik?. Kalau amak lai ndak sibuak bana, buek an Ujang samba randang paku mak? "

" Alhamdulillah, amak sehaik nak. Randang paku ?, biaso anak amak sukonyo randang cubadak "

" Ujang taragak se samo randang paku nan amak buek, jan lupo agiah ikan teri saketek yo mak "

" oooo...jadilah nak "

" yo mak! Mokasih mak, Assalamualaikum"

Ujang langsuang manutuik taleponnyo. Hari lah pukua duo, ujang pun siap - siap barangkek kuliah. Soalnyo ado jadwal diskusi kuliah di kampus sampai pukua ampek.

Nyo ambiak tas, sambia mamasuak bahan - bahan diskusi, supayo beko ndak ado bahan yang tacicia.

Ujang bisa kuliah di kota dek inyo lai cadiak, nyo rajin, sahinggo nyo dapek beasiswa.

Yang namonyo beasiswa, tantu yo ndak sagalonyo ditangguang do.

Kadang - kadang kalau Ujang ndak sibuak kuliah, nyo cari karajo, di kadai nasi urang. Manolongan cuci piriang, ma lap meja, mamasak aia, pokoknyo nan tajangkau dek tangan ujang. Beko dek urang kadai nasi tu, nyo agiah lah ujang samba, nasi dan piti saketek. Jariah payah itulah untuak tambah - tambah balanjo nyo. Ujang tau, amaknyo ndak bisa tiok wakatu mangiriman piti balanjo, maklum kehidupan dikampuang agak susah. Apolai adiak si Ujang ado lo nan sikolah.

Tapi Ujang ndak pernah putus asa jo keadaan inyo, malahan nyo kuat dan semangat supayo nyo bisa sukses ka depannyo.

" Ujang !, japuik lah kiriman waang ka kost ambo, kebetulan ambo pulang kampuang patang, jadi amak waang manitip ka ambo ". Si Farid manelepon Ujang.

" Alhamdulillah, beko habis magrib den ka kost waang yo Farid. Kini den masih ado kuliah a "

" Yo lah "

Farid ko sakampuang jo Ujang, kebetulan samo kuliah di kota, tapi beda kampus. Untuang lah lai ado farid nan mamboak an kiriman ujang, kalau ndak ado tantu lah payah lo Ujang pai ka loket pangiriman barang maambiak kiriman di kampuang.

Habis magrib, Ujang pai manjapuik kirimannyo.

Sampai dikost, nyo bukaklah kardus dan bakabek jo tali rapiah pink tu, ndak sabar bantuak nyo Ujang ingin mancubo randang paku nan dibuek an amak nyo. Selain randang paku, amak Ujang ngiriman bareh juo. Dalam asoi bareh tu, ado surek nan di tulih dek amak Ujang.

" Ujang, hanyo samba randang paku jo bareh saketek yang bisa amak kiriman dulu nyo. Kalau pitih bisuak lah kalau alah tarimo julo - julo batobo amak kasawah urang. Ujang yang rajin baraja yo nak, hemaik - hemaik lah kota, jan dipaturuik an pulo lagak urang, ingek keadaan kito. Semoga Ujang basaba dan kuaik yo nak, amak badoa taruih, agar Ujang sukses. Aamiin "

" Insyaa Allah mak, Ujang akan patuhi nasehaik amak " senyum, sambia mancium surek amak.

Langsuang baranjak ka balakang, cari piriang dan ma ambiak nasi. Soalnyo randang paku mambuek caciang dalam paruik Ujang babunyi - bunyi.